Ваквите активности, според него, имаат за цел дестабилизација на Црна Гора, во кои се вклучени функционери од најмалку две земји во регионот и делови од медиумската сцена во државата
Посочи дека ваквите обиди нема да го променат курсот ниту, пак, ќе го запрат европскиот пат на Црна Гора
Црногорскиот премиер Милојко Спајиќ на својот профил на социјалната мрежа Икс објави дека владата располага со сериозни безбедносни оперативни информации дека по најавеното затворање на нови преговарачки поглавја со Европската Унија ќе следува координирана хибридна акција, во која се вклучени функционери од најмалку две земји во регионот.
„Според нашите сознанија, ваквите активности имаат за цел дестабилизација на Црна Гора, со очекувана поддршка од одредени политички актери и делови од медиумската сцена во нашата земја“,
напиша тој на Икс.
Сепак, не прецизира за кои функционери или кои земји зборува.
Посочи дека црногорските власти се свесни за овие намери и за нивната цел, како и дека тие нема да влијаат на европскиот курс на земјата.
„Знаеме за овие намери и сме свесни за нивната цел. Обидите за дестабилизација нема да го променат нашиот курс ниту, пак, ќе го запрат европскиот пат на Црна Гора, што е поголемо од секојдневниот интерес на која било политичка структура“,
вели Спајиќ.
Imamo ozbiljne bezbjednosne operativne informacije da će najavljeno zatvaranje novih pregovaračkih poglavlja biti praćeno koordinisanim hibridnim djelovanjem, u koje su uključeni zvaničnici najmanje dvije države iz regiona.
— Milojko Spajić (@MickeySpajic) August 27, 2026
Prema našim saznanjima, takve aktivnosti imaju za cilj…
Во Брисел минатиот месец се одржа меѓувладина конференција меѓу ЕУ и Црна Гора, на која земјата ќе ги затвори поглавјето 8, кое се однесува на конкуренцијата, и поглавјето 29 за царинската унија. Со тоа, бројот на затворени поглавја ќе достигне 18 од вкупно 33.
Еврокомесарката за проширување Марта Кос рече дека Црна Гора е цврсто во последната фаза од формалните пристапни преговори.
Претседателот на Европскиот совет Антонио Кошта по Самитот ЕУ – Западен Балкан, кој се одржа на почетокот на јуни во Тиват, изјави дека се очекува Црна Гора да стане 28. членка на ЕУ до 2028 година.