На хипотетичко прашање од новинар дали ако сега (новинарот од прес-конференцијата) се регистрира на ВПН-адреса во Швајцарија и испрати дојава дека има бомба во Владата, полицијата нема да може да го фати, Спасовски одговори: „На хипотетички прашања не може да се одговара. Вие можете хипотетички да поставите милион тези, обидете се направете го тоа или објавете јавно дека ќе го направите, па да видиме што ќе се случи понатаму“
Министерот за внатрешни работи Оливер Спасовски денеска соопшти дека деновиве треба да се одржи состанок на Советот за координација на разузнавачките служби во земјава, на кој меѓу другото ќе бидат разменети и информации за дојавите за поставени експлозивни направи во училиштата и други објекти кои изминатиот период се случуваат во континуитет.
Во врска со денешните дојави за поставени бомби во училишта во Скопје и Куманово, Спасовски рече дека се преземаат сите мерки предвидени со протоколите и дека постои штаб што постојано работи на оваа проблематика.
„Има штаб кој што работи постојано на оваа проблематика и веднаш не само одделот за дигитална форензика туку и сите меѓународни партнери се известуваат во однос на сите овие дојави кои што ги имаме сè со цел да добиеме помош“,
рече Спасовски на денешната прес-конференција на која го презентираше предлог-буџетот на МВР за 2023 година.
Тој, повтори дека заканите за поставени бомби најчесто доаѓаат ВПН-адреси (виртуелни приватни мрежи) од кои не може да се добие една конкретна ИП-адреса од каде е испратена електронската пошта.
Онаму каде што може да се утврди од каде е испратен мејлот, полицијата утврдува, додаде Спасовски, наведувајќи како пример еден случај во Скопје. Тој не беше прецизен за кој случај, но најверојатно станува збор за единствениот случај за кој, како што е познато, полицијата поднесе кривична пријава против малолетник поради закани за поставени бомби во четири училишта.
„Таму каде што има можност да се утврди ги утврдуваме, таков беше случајот со Скопје, сега сме веќе на пат и многу блиску да се расчисти целиот случај и во Општина Кавадарци (каде исто така имаше дојави за бомби во училишта). Се преземаат сите можни мерки, секторот за меѓународна полициска соработка е во постајана комуникација со Интерпол, Европол. Јас очекувам деновиве да се одржи и Советот за координација на разузнавачките служби на кој ќе треба да ги размениме сите податоци. Значи и Агенцијата за национална безбедност (АНБ) и Агенцијата за разузнавање (АР) и Комитетот за борба против тероризмот, се со цел да преземеме низа на мерки не само конкретно во овој случај туку генерално во решавањето на проблемот со тероризмот. Сите меѓународни партнери се известени и се работата да помогнат онаму каде што може“,
изјави министерот за внатрешни работи.
Прашан каква е проценката за безбедносната состојба во државата во моментов, а во контекст на дојавите за поставени експлозивни направи, Спасовски рече дека нема индиции за било какво нејзино нарушување.
„Сè што преземаме, преземаме, пред сè, за да бидат безбедни граѓаните. Инаку, немаме во моментот индиции за било какво нарушување на безбедносната состојба“,
беше категоричен Спасовски.
Тој повтори дека од самите дојави се гледа дека тие се дел од т.н. хибридна војна која се „спроведува не само кај нас“.
„Информациите генерално ние ги споделуваме и со околните земји кои што добиваат вакви закани, Србија во континуитет веќе со години, Црна Гора, Хрватска, Германија, САД, Нов Зеланд на повеќе места во овој период се случува ова и практично и дојавите, односно текстот на пораките е речиси ист“,
рече министерот за внатрешни работи.
На хипотетичко прашање од новинар дали ако сега (новинарот од прес-конференцијата) се регистрира на ВПН-адреса во Швајцарија и испрати дојава дека има бомба во Владата, полицијата нема да може да го фати, Спасовски одговори:
„На хипотетички прашања не може да се одговара. Вие можете хипотетички да поставите милион тези, обидете се направете го тоа или објавете јавно дека ќе го направите, па да видиме што ќе се случи понатаму“.
Инаку, денеска дојави за поставени експлозивни направи стигнаа на електронските адреси на осум училишта во скопската Општина Аеродром и во четири училишта во Куманово.