Утре во кабинетот на претседателот Стево Пендаровски ќе се одржи редовна седница на Советот за безбедност, а како што информираат оттаму единствена точна на дневен ред ќе биде информација за стратешки набавки во Армијата во наредниот период.
Почетокот на седницата е закажан во 13 часот, а покрај членовите на Советот, на покана на Пендаровски ќе присуствуваат и: началникот на Генералштабот на Армијата, генерал-потполковник Васко Ѓурчиновски, директорот на Агенцијата за разузнавање, Еролд Муслиу и директорот на Агенцијата за национална безбедност, Виктор Димовски.
Советот за безбедност е највисокото советодавно тело во државата и ги разгледува прашањата сврзани со безбедноста и одбраната на Републиката и дава предлози на Собранието и на Владата.
Негови членови се: претседателот на Собранието Талат Џафери, премиерот Зоран Заев, министерот за внатрешни работи Оливер Спасовски, министерката за одбрана Радмила Шекеринска, шефот на дипломатијата Бујар Османи, како и професорот на Правниот факултет „Јустинијан Први“ при УКИМ Ненад Марковиќ, професорот на Универзитетот на Југоисточна Европа, Ветон Љатифи и поранешниот министер за одбрана и универзитетски професор Трајан Гоцевски.