Во градинките од утре прекинува штрајкот и децата ќе се прифаќаат со вообичаената рутина
Од СОНК најавија и одржување на масовен протест пред Владата на 4 мај
Првиот човек на СОНК, Јаким Неделков, пред седиштето на Синдикатот за медиумите изјави дека советот одлучил протестот од утре да продолжи во основните и средните училишта, додека градинките ќе продолжат нормално да функционираат.
„Од вкупно 480 синдикални организации коишто дадоа податоци за нивното изјаснување во однос на договореното со Владата, 388 беа за продолжување на штрајкот од утре, а само 83 беа за прекинување на штрајкот. Најголемиот дел од оние кои што се изјаснија за прекинување на штрајкот, се синдикалните организации за детската заштита, а без исклучок огромниот број на оние кои се за продолжување на штрајкот се колегите и колешките од основното и средното образование. Советот на СОНК со оглед на сумираните резултати донесе одлука штрајкот да продолжи во основното и средното образование и во текот на утрешниот ден, се до наоѓање на заедничко прифатливо решение со Владата и МОН“,
изјави Неделков.
СОНК и Владата вчера постигнаа договор за покачување на платите на наставниците од 12 отсто, што е различно од првичните барања на синдикатот покачувањето да биде 18,4 отсто.
Покрај ова, тој најави и одржување на голем протест пред Владата на 4 мај.
„Исто така, советот на СОНК во знак на незадоволство од резултатите на преговорите ќе организира масовен протест пред Владата во среда на 4 мај. Советот на СОНК исто така жали за прекинот на наставата и пропуштеното во однос на неодење на учениците во училиште, жалиме и поради родителите кои имаат проблеми со згрижување на децата, но истовремено бараме разбирање и поддршка, бидејќи во секој случај јасно е дека ако имаме задоволни и мотивирани наставници образовниот процес ќе биде многу подобар“,
изјави Неделков.