Граѓаните кои претрпеа штети треба да поднесат барање, а соодветна комисија ќе утврди колкави се. Доколку се работи за помали износи, штетата ќе биде надоместена од општинскиот буџет, а во случај да ги надминува можностите на локалната самоуправа, помош ќе се бара од државата, изјави претседателот на Советот на Општина Гостивар.
Советот на Општина Гостивар на седница ќе ја разгледува фактичката состојба во градот по поплавите кои синоќа го зафатија како резултат на невремето со пороен дожд. Покрај проценка на состојбата, советниците ќе ја разгледуваат и можноста за надомест на штетите од невремето кои ги претрпеле граѓаните.
„По пријавите, уште синоќа со претставници на надлежните служби излегоа на терен на повеќе критични места. Граѓаните кои претрпеа штети треба да поднесат барање, а соодветна комисија ќе утврди колкави се. Доколку се работи за помали износи, штетата ќе биде надоместена од општинскиот буџет, а во случај да ги надминува можностите на локалната самоуправа, помош ќе се бара од државата“,
изјави Ваљбон Лимани, претседател на Советот на Општина Гостивар.
Излевањето на водата од каналите за наводнување и надојдените потоци и реки, предизвикани од синоќешниот пороен дожд на подрачјето на Општина Гостивар, поплавија повеќе десетици домови во населбата Бањешница и селото Беловиште. Повеќе граѓани од населбата Бањешница упатија барање до надлежните служби да го решат проблемот со каналот за наводнување бидејќи сметаат дека неговото нередовно чистење го отежнува текот на водата во случај на пообилни врнежи.
Во овој дел од Гостиварско пријавени се штети од поплавување на дваесетина куќи и имоти.