Од Советот на амбасадори велат дека внимателно го следат развојот на настаните поврзани со јавната дебата околу содржината на францускиот предлог за интеграција на земјава во ЕУ преку симнување на бугарското вето, како и протестите на граѓаните
Како што наведува во реакција до медиумите, Советот на амбасадори изразува загриженост поради радикализација на политичките состојби во општеството и постои висок потенцијал на нарушување на меѓуетничките односи во земјата.
Се добива впечаток дека одредени политички партии ги злоупотребуваат емоциите на граѓаните за сопствени политички цели, дури и по цена на нарушување на мирниот меѓуетнички живот. Признавајќи го уставното право на граѓаните да ги изразуваат своите ставови и чувства преку демонстрации на мирен и достоинствен начин, Советот на амбасадори го осудува секој обид или форма на вандалско однесување на поединци или организирана група демонстранти, како што ги имаше во последните два дена на овие мировни манифестации,
информира Извршниот одбор на Советот на амбасадори.
Оттаму наведуваат дека внимателно го следат развојот на настаните поврзани со јавната дебата околу содржината на францускиот предлог за интеграција на земјава во ЕУ преку симнување на бугарското вето, како и протестите на граѓаните.
Совет на амбасадори посочува дека нема цел да ги стигматизира политичарите или интелектуалците, а уште помалку, како што е наведено, граѓаните кои демонстрираат или ги поддржуваат овие манифестации.
„Но, е против агресивните и ирационални испади, физички насилства кои имаат цел да ја дестабилизираат земјата или по пат на насилство да ја оневозможат интеграцијата на државата во ЕУ. Советот, исто така, е против лансирање на секој вид лажни вести со цел манипулација со јавното мислење, поттикнувањето на разни сценарија од странска провениенција, држејќи се цврсто до нашата НАТО-ориентација и ЕУ-интеграција“,
пишува во реакцијата на Советот на амбасадори.
Оттаму апелираат на смиреност на граѓаните и на отворен дијалог и аргументирана расправа на претставниците на политичките партии во дебатите во парламентот и со претставниците на Владата.