Ова е заклучокот од седницата на Советот за национална безбедност која се одржа денеска во кабинетот на шефот на државата Стево Пендаровски, а која се одржува во период на сè уште активната војна во Украина, но и по неодамнешните тензии на северот на Косово и ескалацијата на конфликтот на Блискиот Исток
Безбедносната состојба во државата е стабилна и нема индиции кои укажуваат на нејзино можно загрозување.
Ова е заклучокот од седницата на Советот за национална безбедност која се одржа денеска во кабинетот на шефот на државата Стево Пендаровски, а која се одржува во период на сè уште активната војна во Украина, но и по неодамнешните тензии на северот на Косово и ескалацијата на конфликтот на Блискиот Исток.
На денешната, 19. седница на Советот за безбедност, како што информираа од кабинетот на претседателот, надлежните претставници на институциите информираа за тековните безбедносни прашања поврзани со земјата и поширокиот регион, а во контекст на руската инвазија, случувањата на Блискиот Исток и состојбата во Косово.
„Како членка на НАТО, Република Северна Македонија е во редовна координација со Алијансата и сојузниците по однос на активности кои се преземаат за зајакнување на безбедноста во евроатлантскиот простор“,
се додава во соопштението за денешната седница на Советот.
Дополнително, констатирана е потреба за натамошно следење на состојбите од страна на надлежните институции и изготвување на можни сценарија согласно развојот на настаните со цел навремено преземање мерки и активности од нивна надлежност.
Покрај Пендаровски, во Советот за безбедност членуваат и собранискиот спикер Талат Џафери, премиерот Димитар Ковачевски, министерот за внатрешни работи Оливер Спасовски, министерката за одбрана Славјанка Петровска, министерот за надворешни работи Бујар Османи, како и универзитетските професори Ненад Марковиќ, Ветон Љатифи и Трајан Гоцевски.
Освен нив, на денешната седница присуствуваа и директорот на Агенцијата за национална безбедност, Зарко Милошевски и директорот на Агенцијата за разузнавање Еролд Муслиу.