Русковска до пратениците за 27 април: Дали тоа што два месеца дававте реплики „потполно се согласувам“ е спротивно на Деловникот?
Пратеници од ВМРО-ДПМНЕ во претходниот собраниски состав попладнево продолжија да сведочат во случајот со организацијата на настаните од 27 април 2017 во Собранието.
Илија Димовски, Зоран Илиоски, Лилјана Кузмановска, Благој Деспотовски, Слаѓана Митовска, Весна Пемова и Весна Дамчевка сведочат по предлог на одбраната и повеќето одговараа на исти прашања.
Го објаснуваа Деловникот и текот на конститутивната седница по изборите во декември 2016, како и за правилата за дискусија, реплика и процедурални обраќања. Адвокатот на Трајко Вељаноски, Еленко Миланов, преку прашањата за овие околности сакаше да укаже дека неговиот клиент како претседавач со конститутивната седница не го прекршил Деловникот ниту го опструирал текот на седницата.
Речиси со исти искази, тие сведочеа дека претседавачот немал право да им го скрати правото на збор, но Вељаноски, за да не се одолговлекува работата, често апелирал пратеници да се откажат од дискусија.
„Немаше грешка во водењето на таа седница. Со неговите сугестии, сугерираше да се забрза процедурата. Дури и кога пратениците од СДСМ бараа да се премине на следната точка, се сеќавам дека тој укажуваше дека тоа не е деловнички, но ги замолуваше пратениците да се забрза работата“,
рече експратеникот Зоран Илиоски кој како и останатите кажаа дека од партијата немале план или насоки за некакво насилство или опструирање на изборот на претседател.
Обвинителката Вилма Русковска, пак, токму за Илиоски имаше прашање за овие околности потенцирајќи дали е реплика тоа што пратениците реплицирајќи зборуваа всушност дека се согласуваат со колегата.
„Кажавте дека секој има право на 10 минути говор и 3 минути реплика, ако некој не се согласува со тоа што го кажал колегата пратеник. Дали може да заклучиме дека репликите што ги слушавме два месеци, во смислла ‘потполно се согласувам со почитуваниот колега’ биле во спротивност со Деловникот и претседавачот тоа го дозволувал?“,
праша Русковска.
Илиоски, пак, одговори дека не е прекршен Деловникот.
„Мене како пратеник ми е должност да ги искажам мислењата на граѓаните за кои сум избран, не може претседател или претседавач да ми го ускрати правото ако не се согласувам со некого“,
одговори пратеникот, на што Русковска повторно спомена дека во Собрание се слушаа реплики дека потполно се согласуваат, а не обратно.
Сите пратеници сведочеа и дека немало други ситуации да се премине од една на друга точка од дневниот ред, како што било случај кога СДСМ на 27 април бараше да се премине од точката за избор на Комисија за избори и именување, на точката за избор на претседател на Собранието, иако не била исцрпена листата на пријавени дискутанти.
Обвинителството, пак, од друга страна, тврди дека согласно Деловникот тоа е дозволено во член 78 став 2.
Денешните седум сведоци се втора група пратеници од минатиот состав кои сведочат во случајот за организацијата на настаните од 27 април. Минатата недела во судницата зборуваа деветмина: Никола Мицевски, Трајчо Димков, Драган Данев, Крсто Јовсновски, Панчо Минов, Благица Ласоска, Магдалена Манаскова, Иван Иванов и Иван Стоилковиќ.
Покрај Вељаноски, обвинети во случајот за организација на 27 април се и ексминистрите Миле Јанакиески и Спиро Ристовски и поранешниот директор на Управата за безбедност и контраразузнавање (УБК), Владимир Атанасовски. Тие седат на обвинителна клупа за делото терористичко загрозување на уставниот поредок и безбедноста.
Во истрагата за овој предмет беа опфатени и бившиот премиер Никола Груевски и ексразузнавачот од УБК, Никола Бошковски, кој беше споменуван како едно од лицата кои контактирале и соработувале со Нинџа. Двајцата избегаа од државата, Груевски во Унгарија, а Бошковски во Грција, па кога обвинителката Вилма Русковска го поднесе обвинителниот акт, тие не беа на листата обвинети и беше соопштено дека постапката за нив ќе продолжи кога тие ќе бидат достапни на органите.