Властите во Канбера денеска објавија дека ќе им понудат надомест во износ од вкупно 82 000 австралиски долари (51 000 евра) на членовите на домородното население, кои биле присилно земени од нивните семејства како деца и предадени на нови бели семејства.
Поради зголемените критики и практиката на Абориџините да бараат надомест на суд, властите одлучија дека секој што е жртва на таа практика ќе добие 75 000 австралиски долари за штетата што им е нанесена со присилното одвојување од семејствата без согласност од нивните биолошки родители и дополнителни 7 000 долари поради емоционална траума, пренесува Ројтерс.
Повеќе од 100 000 домородни деца Абориџини биле земени од нивните семејства и заедници помеѓу 1900 и 1970 година, што поранешниот премиер Кевин Рад во 2008 година го опиша како „голема дамка на душата на нацијата“ за време на формалното извинување на т.н. „украдена генерација“.
„Ова е долгоочекуван чекор, признавање на врската помеѓу заздравувањето на раните, достоинството и здравјето и благосостојбата на членовите на украдените генерации, нивните семејства и заедници“,
рече премиерот Скот Морисон денеска во парламентот.
Планот за надомест се однесува на сите живи Абориџини што биле разделени од своите семејства кога биле на возраст под 18 години и живееле на територијата на главниот град на Австралија и во Северната Територија, а повеќето други австралиски држави спроведуваат свој план за компензација.
Домородните заедници го поздравија потегот на владата, но веруваат дека останува уште многу да се направи, особено на планот на економијата и образованието.
Во Австралија, држава со 26 милиони жители, живеат околу 700 000 Абориџини, кои, според официјалните истражувања, заостануваат во речиси сите економски и социјален показатели.