Секторите за внатрешни работи Скопје и Битола известија за активностите кои ги презеле во текот на вчерашниот ден во областа на сообраќајот. Скопските сообраќајци не биле фокусирани на посебен вид прекршувања на правилата, додека за СВР Битола во центарот на вниманието бил „ловот“ на возачи под дејство на алкохол.
На територија на град Скопје, при контролите се изречени вкупно 210 мерки, меѓу кои за возење повеќе од дозволената брзина 105 санкции, шест мерки за возење без возачка дозвола, 10 санкции за возење под дејство на алкохол. Изречени се седум мерки за минување на затворен сигнал (црвено светло), две санкции за возач почетник.
Во засилената акциска контрола за санкционирање на возачи кои управуваат возило под дејство на алкохол, сообраќајците од СВР Битола во текот на изминатата вечер, во периодот од 23:00 до 05:00 часот казниле 65 возачи. Седум од нив се од Битола, по двајца од Ресен и Крушево, тројца возеле поднапиени во Македонски Брод, а едно лице е од Демир Хисар. Сепак, фрапантна е бројката од 50 лица кои под дејство на алкохол „управувале“ со своите патнички возила само во Прилеп.
За време на контролата биле санкционирани и 51 друг вид прекршоци.
Од полицијата известуваат дека акциски контроли ќе има и наредните денови и апелираат до граѓаните да ги почитуваат сообраќајните правила.