Учениците нема да може да ја завршат учебната година ако наставниците не добијат пари за прекувремена работа – предупреди СОНК. Од синдикатот ги повикаа училиштата, локалните власти и Министерството за образование до 1 јуни да ги исплатат наставниците кои работеле повеќе работни часови за време на пандемијата бидејќи во спротивно ќе се соочат со штрајк и неиздавање свидетелства за учениците.
„За време на пандемијата наставниците работеа повеќе, односно бројот на часови за настава им беше зголемен бидејќи децата беа поделени во две групи. За жал, власта и институциите не го препознаа зголемениот обем на работа на наставниците и не исплатија додатоци. Од Министерството за образование велат дека имаат префрлено средства за оваа намена на општините, но според нашите информации од терен, оттаму велат дека нема пари. Впрочем, нас не нѐ интересира дали има пари или не, важно ни е да се почитуваат законите“,
изјави Јаким Неделков од СОНК.
Неделков рече дека се обратиле и до Трудовата инспекција, која според него не постапила професионално зашто не препознала дека наставниците работат двојна работа. А според информациите на СОНК, иста ситуација е и во градинките, каде што воспитувачите и негувателите се принудени да работат по 8 часа.
Веќе во некои училишта од Куманово била донесена одлука за штрајк ако до 1 јуни во платниот список не се пресметаат сите средства што се должат, изјави Неделков кој повтори дека учебната година нема да заврши за учениците од основното и средното образование.