Приоритетна треба да биде директна финансиска поддршка, преку доделување грантови за најпогодените сектори, за да се ублажат негативните од пандемијата, бидејќи има дејности што се пред пропаѓање, велат од ССК
Сојузот на стопански комори (ССК) ѝ предлага на владата 25 мерки за ревитализација на домашната економија, погодена од ковид-кризата. Сојузот предлага конкретна и директна поддршка за претпријатијата, а предлозите се веќе доставени до надлежните институции. ССК очекува Владата да ги усвои предложените мерки и да ги имплементира во соодветна временска рамка.
Дел од предлозите на ССК
- Олеснет пристап до бескаматни кредити за покривање на варијабилните трошоци;
- Потранспарентно промовирање на кредитните линии и овозможување пристап за сите што имаат потреба од ваквите средства;
- Обезбедување национална гарантна шема за поддршка на фирмите при кредитирањето;
- Директно и неселективно продолжување на мерката „месечна финансиска помош од 14.500 денари“ до март 2021 година
ССК апелира и да се одложат сите даночни долгови за 2020 година, да се плаќаат на рати, без камата. Потребно е, сметаат оттаму, и итно справување со сивата економија со соодветни достапни механизми кои може да се имплементираат веднаш.
Според претседателот на ССК, Данела Арсовска, предлог-мерките се скромни со оглед на состојбите во економијата и се засновани на широк процес на консултации во приватниот сектор.
„Предлозите се базирани на реалните потреби на стопанството кое се соочува со голем број предизвици од кои најголем е нарушената ликвидност која многу брзо, доколку не се обезбеди итна финансиска помош, може да доведе до затворање на правните субјекти. Приоритетна мерка треба да биде директна таргетирана финансиска поддршка преку доделување грантови за помош за најпогодените сектори, за да се ублажат негативните ефекти врз економијата предизвикани од пандемијата, бидејќи има дејности кои се пред пропаѓање. Неопходно е да се креираат прецизни протоколи за работа за сите дејности од Националната класификација на дејности, со цел да им се овозможи на сите право подеднакво да функционираат во контролирани услови по квалитетно утврдени правила. Исто така, од голема важност е да се предвиди можност за одложување или репрограмирање на постоечките кредити за оние претпријатија кои се борат со одржување на ликвидноста за да се превенира пропаѓање или одземање на имотите од страна на банките“,
вели Арсовска.
Дополнително, ССК достави посебни финансиски мерки за секторите угостителство, туризам и транспорт. Важно е, нагласува, да не се дозволи претпријатијата од секторот транспорт да пропаднат во време на криза, зашто основните транспортни услуги нема да бидат лесно достапни кога ќе почне периодот на економското закрепнување.