Меѓу четирите барања на Сојузот се и смена на соодносот на коефициентите на предметите, т. е. екстерните предмети да носат 20 поени, интерните 16 поени и проектната задача да носи 4 поени. Досега екстерните предмети носеа максимум 25, а интерните 12 поени
Сојузот на средношколци, по денешното Генерално собрание, излезе во јавноста со четири конкретни барања поврзани со полагањето на годинашната државна матура – тема која деновиве ja актуализираа матурантите со барањето за кратење на материјалот за испитите или укинување на еден интерен предмет.
Прво од четирите барања на Сојузот е смена на коефициентите за екстерните и интерните предмети при упис на универзитетите.
Според моменталниот модел на упис на универзитетите, појаснуваат од Сојузот, оценките од свидетелствата носат најмногу 60 поени, а останатите 40 поени се од оценките добиени на државната матура. Максималните поени, пак, кои можат да се добијат од екстерните предмети се 24, а најмногу 12 поени носат интерните испити, додека проектната задача носи највеќе 4 поени.
„Сојузот предлага да се промени соодносот, т. е. екстерните да носат 20 поени, интерните 16 поени и проектната задача да носи 4 поени“,
велат оттаму и додаваат дека на овој начин интерните испити ќе имаат поголема тежина при упис на универзитетите.
Во второто барање, Сојузот ѝ предлага на Владата на сите универзитети во земјава да им препорача замена на првиот екстерен предмет (мајчин јазик) со соодветен, што, како што се вели, ќе го зголеми неговиот придонес во поените за државната матура.
Средношколскиот сојуз бара од надлежните и смена на датумот на кој ќе се полага првиот екстерен предмет, кој е веќе закажан за 27 мај.
„Доколку е можно, имајќи го предвид православниот празник Духовден, да се помести првиот екстерен испит од 27 мај на 3 јуни“,
велат оттаму и додаваат дека останатите испити е во ред да се полагаат на веќе одредените датуми.
Четвртото и последно барање на Сојузот на средношколци е професорите да ги споделат со учениците материјалите и прашањата за интерните испити најдоцна четири недели пред одржување на испитот, а бројот на прашањата да биде трипати поголем од бројот на прашања на испитот.
Ваквите барања, кои Сојузот на средношколци смета дека се во интерес на сите средношколци, најави дека ќе ги испрати до Владата, Министерството за образование и наука (МОН) и до Државниот испитен центар (ДИЦ).