Првиот човек на Државната агенција „Национална безбедност“, Пламен Тончев, во пленарната сала на парламентот излезе со тврдење дека „советник на бугарски премиер го координирал ставот на Министерството за надворешни работи на Бугарија со македонски државјанин во текот на преговарачкиот процес на Република Северна Македонија со Европската Унија“
Со Весела Чернева, како советничка на бугарскиот премиер Кирил Петков, ги водевме најтешките преговори – вели министерот за надворешни работи Бујар Османи во изјава за „360 степени“, прашан да ги коментира наводите на бугарската служба за безбедност дека „советник на бугарски премиер го координирал ставот на Министерството за надворешни работи на Бугарија со македонски државјанин во текот на преговарачкиот процес на Република Северна Македонија со Европската Унија“.
Тврдењето дојде лично од претседателот на Државната агенција „Национална безбедност“ (ДАНС), Пламен Тончев, при неговиот распит на пленарна седница на бугарскиот парламент. За случајот е поведена предистражна постапка, изјави тој. Веднаш по него, Тошко Јорданов, пратеник од партијата Има таков народ на Слави Трифонов, сугерираше дека Весела Чернева е советничката против која се води предистражна постапка бидејќи „се расправала со Македонците“. Ќе се преземат ли мерки против Петков и Василев ако ѝ ги дале овие нарачки, праша Јорданов.
Шефот на македонската дипломатија Османи вели дека во тој период (при разговорите со Чернева, н.з.) бил направен најмал исчекор.
Според наводите на првиот човек на ДАНС, советникот ја доставил бугарската национална позиција на странец во РСМ. Постапките на оваа личност не биле без согласност на неговите претпоставени, пренесува БНТ. На прашање, Пламен Тончев рече дека „министри од редовната влада дефинитивно не работеле за националниот интерес“.
Обвинувањата против Чернева доаѓаат среде обидите за формирање редовна политичка влада по начелниот политички договор меѓу двете првопласирани групации на последните избори ГЕРБ-СДС (на Бојко Борисов) и ПП-ДБ (на Кирил Петков/Асен Василев и Христо Иванов), со што би ослабнала позицијата на претседателот Румен Радев и на неговите кадри во институциите, вклучувајќи ги и безбедносните. Пред неколку дена протече снимка од состанок на раководството на Продолжуваме со промените (ПП) на која се слушаат плановите на лидерството на партијата при формирањето влада со ГЕРБ-СДС, меѓу другото, и за смени во безбедносните служби. Снимката ја објави Радостин Василев, избран за пратеник од листата на ПП-ДБ на последните избори, кој претходно беше дел од Има таков народ на Трифонов и министер за спорт во владата на Петков.