Вицепремиерот и министер за односи меѓу заедниците Иван Стоиљковиќ најави дека се во тек преговори со српската влада, со кои ќе се направи бизнис-зделка со која „Македонски железници“ ќе добијат 4 товарни локомотиви, а за возврат ним ќе им бидат дадени стари вагони.
„Директорот на ‘Македонски железници’ е од мојата партија. Ние викендов работевме со српската влада и еве, можам да кажам дека во тек се преговори во наредните 10 до 15 дена четири товарни локомотиви да пристигнат во Македонија. Со нив ќе може полесно да се врши транспортниот сообраќај низ земјава. Тоа ќе придонесе и за стопанството. Србите за возврат ќе добијат стари вагони кои ќе си ги репарираат, тие имаат фабрика за производство на вагони и ќе ги репарираат таму“,
рече Стоиљковиќ.
Стоиљковиќ истакна дека не знае за каква зделка станува збор бидејќи тоа е во сферата на надлежност на директорот на „Македонски железници“, а дека тој само обезбедил политичка поддршка од Србија за локомотивите што поскоро да стасаат.
„Се надевам дека многу бргу ќе се сликаме во Ниш со надлежниот српски министер“,
изјави Стоиљковиќ.
Во интервјуто во „Вести плус“ на ТВ Канал 5, Стоиљковиќ не сакаше да ги коментира најавите од Владата дека се размислува средствата наменети за пругата кон Бугарија да бидат пренаменети за изградба на железницата од „Табановце“ до „Богородица“, со укажување дека тоа е прашање за министерот за транспорт и врски Александар Николоски.
Информацијата за преговорите за зајакнување на транспортот на Коридорот 10 доаѓа во период кога од Владата сè погласно се најавува можноста делницата од „Табановце“ до Гевгелија да биде приоритетна наспроти Коридорот 8 со кој земјава се поврзува со Бугарија и со Албанија.
Министерот за транспорт Александар Николоски недоамна ја обвини Бугарија дека не е е сериозна во однос на проектот за Коридорот 8 и најави дека ќе побара парите што ЕУ ги дава како финансиска помош за изградба на пругата од Куманово до Крива Паланка да бидат пренаменети за изградба на брза пруга од границата со Србија до границата со Грција, за да можат возовите да одат со 100 до 120 километри на час.
Официјална Софија изрази зголемена доза на вознемиреност и посочи оти ги следи изјавите на официјални македонски политичари насочени кон кршење на меѓународните обврски на инфраструктурно поврзување, односно најавите дека Скопје ќе бара од Европската банка за обнова и развој да ги пренасочи европските пари за изградба на железничката компонента од Коридорот 8 за брза пруга на Коридорот 10.
Во соопштението на бугарската влада се вели дека токму Коридорот 8 е клучна логистичка рута вдолж јужното крило на НАТО со кое се поврзуваат Црното и Јадранското Море и затоа неговата изградба е од големо значење во актуелниот геополитички момент, а затоа одбивањето да се изградат главните компоненти ја ослабнува колективната безбедност на НАТО-алијансата.
Пред два дена и специјалниот германски пратеник за Западен Балкан, Мануел Сарацин, изјави дека европскиот транспортен Коридор 8 е од стратегиско значење за регионот и дека транспортните коридори во Европа се во надлежност на Брисел и ниту една земја не може да ги менува европските приоритети во транспортната политика.