Министерот за надворешни работи Бујар Османи и амбасадорот на Република Косово, Флоријан Ќехаја, во паркот Чаир засадија 13 дрва по повод одбележувањето на 13 годишнината од воспоставувањето на дипломатските односи меѓу Република Северна Македонија и Република Косово.
Заблагодарувајќи му се на амбасадорот Ќехаја за иницијативата, Османи истакна дека настанот на симболичен начин ги отсликува одличните добрососедски односи и традиционалното пријателство меѓу двете држави.
“Често повторувам дека Приштина и Скопје се и буквално најблиските главни градови на Балканот, симболизирајќи ги со тоа исклучително блиските односи меѓу Северна Македонија и Косово, но и блиските врски меѓу нашите граѓани“,
кажа Османи.
Османи кажа дека оваа иницијатива е добра прилика за да се стави фокус на зелената агенда кој е еден од приоритетите на надворешна политика на земјава.
Косовскиот амбасадор се заблагодари за поддршката во интегративниот процес и членството на Косово во меѓународните организации.
“Сме постигнале високо ниво на односите со Северна Македонија -одлична соработка, која во периодот што следи, убеден сум, ќе се зајакне уште повеќе”,
изјави амбасадорот Ќехаја.
На настанот присуствуваа и истакнати личности и интелектуалци, кои даваат значаен придонес во негувањето на односите помеѓу Северна Македонија и Косово.