Ќе бидат потребни напори, ќе треба да се запознаеме повеќе. Големиот разговор е како може да се создаде позитивна политичка атмосфера меѓу двете страни, заснована на убедување дека ќе треба да одиме заедно по патот на ЕУ, вели известувачот за С Македонија во ЕП
Договорот од Преспа, генерално, кажува дека Северна Македонија нема никаква поврзаност со античка Грција и тука разговорот завршува, се става точка. Но, со Договорот за добрососедство со Бугарија од 2017 година се поставува запирка и можеби оттаму доаѓа поголемото, покомплексното прашање, изјави бугарскиот европратеник и известувач во Европскиот парламент за земјава, Илхан Ќучук.
Тој синоќа во гостување на ТВ21 оцени дека ќе биде потребно време да се реши проблемот меѓу Северна Македонија и Бугарија и дека ќе треба подобро да се запознаеме.
Договорот од 2017 година, поставувајќи ја темата за заедничка историја, кажува и уште нешто – дека тоа прашање не може да биде решено во рок од неколку години. Тоа е значајната разлика со Договорот од Преспа“,
рече Ќучук.
Според него, треба време за да се реши ова прашање и за неколку години нема да се дојде до едноставен одговор на „многу сложени прашања таложени во текот на годините“.
„Ќе бидат потребни напори, ќе треба да се запознаеме повеќе. Евидентно е дека за исти историски настани имаме различно толкување, имаме различно објаснување, различно гледање, едно во Бугарија друго во Северна Македонија“,
изјави Ќучук.
Европратеникот смета дека не треба да се очекува земјава да ги почне преговорите за членство во ЕУ во јуни, со оглед на случувањата во Бугарија и немањето политичка влада.
„Ако гледаме на тоа како статичен феномен, односно бараме одреден датум кога Гордиевиот јазол би се разврзал, тогаш веројатно нема да најдеме датум, колку и да се обидуваме да го најдеме. За мене големиот разговор е како може да се создаде позитивна политичка атмосфера меѓу двете страни, заснована на убедување дека ќе треба да одиме заедно по патот на Европската Унија“,
додаде Ќучук.