Оваа нова даночна реформа претставува ревидирање на даночните ослободувања, проширување на даночната основа и крајно сузбивање на неформалната економија со што секој ќе го плати својот фер дел во буџетот, рече премиерот во одговор на пратеничко прашање
Со новиот концепт на даночна реформа се воведува праведен, ефикасен и модерен даночен систем кој овозможува стабилни приходи, економски раст и подобри услуги за граѓаните рече премиерот Димитар Ковачевски денеска одговарајќи на пратенички прашања.
„Ќе повторам дека со новата даночна реформа не се предвидуваат нови даноци, не се предвидува зголемување на даноците, односно данокот на личен доход останува со една стапка од 10 проценти, се укинува прогресивното оданочување кое требаше да стапи на сила од 1-ви јануари 2023 година, данокот на добивка останува 10 проценти и не се зголемува, данокот на додадена вредност останува 18 проценти и не се зголемува. Каматите на депозитите и штедните влогови, иако решението требаше да стапи на 01.01.2023, нема да се оданочуваат. Оваа нова даночна реформа претставува ревидирање на даночните ослободувања, проширување на даночната основа и крајно сузбивање на неформалната економија со што секој ќе го плати својот фер дел во буџетот и притоа ќе се намали предноста што некои ја имаат заради даночните ослободувања и нееднаквиот третман на либералниот пазар“,
рече премиерот Ковачевски потенцирајќи дека за новиот концепт се воделе консултации со Стопанските комори и сите засегнати страни.
Во однос на иницијативата за воведување на данок за екстра профит, претседателот на Владата на Република Северна Македонија истакна дека постои ваква иницијатива која се разгледува низ инклузивен и консултативен процес со повеќе засегнати страни.
Ковачевски посочи дека постои иницијатива за данок на екстра профит кој во различни држави носи различно име.
„Може и кај нас финално ќе има друго име. Во Хрватска се нарекува солидарен придонес од страна на компаниите кои остваруваат екстра профити. Сметаме дека воведувањето на ваков данок може да биде во прилог на државата во време на криза. Овој данок не е непознат и не е ништо ново и таков данок имаат воведено и други земји. Сум бил сведок на воведување на вакви даноци во други држави кога сум работел во време на светската финансиска криза кога и во Унгарија се воведуваше ваков данок“,
рече премиерот Ковачевски.
Премиерот истакна дека со неговата имплементација би се оданочувал екстра профитот, заради тоа што во време на криза различни компании од разни индустрии како резултат на инфлацијата, на растот на цените остварија екстра профит и сметаме дека тој профит треба да се оданочи.
За оваа иницијатива веќе се разговара со Стопанската комора затоа што сметаме дека ова е важен процес во кој треба да бидат вклучени сите на кои се однесува. Се води дискусијата за нов вонреден данок на екстра добивка по примерот на европските земји.
„Доколку се одлучи да се воведе вонредниот данок би се однесувал на компании што имаат над 10 милиони евра приходи на годишно ниво. Тоа е приход кој што е за 20 отсто повеќе од четиригодишниот просек и ќе предвидува дополнително оданочување само на екстра приходите на тој четиригодишен просек“,
рече Ковачевски.
Даночната реформа, додаде Ковачевски, не беше само за фискални приходи, туку се базира на стратегијата за даночна реформа која беше донесена од страна на Владата уште во декември 2020 година каде главни цели се да се воспостави еден даночен систем кој ќе овозможи одржлив, инклузивен и забрзан економски раст врз основа на нови технологии и подобрување на ефикасноста на даночниот систем.
„Даночната база се предлага да се зголеми по две основи и тоа го вклучи даночната политика. Едниот основ е намалување на сивата економија за што имаме посебна стратегија, а другиот аспект е намалување на даночните трошоци или даночните ослободувања или рефидирање на листата на даночни ослободувања“,
додаде премиерот во одговорот на пратеничко прашање.