Одбележувањето на депортацијата на македонските Евреи под мотото „11 март 1943 – Никогаш повеќе” ќе се заокружи со комеморативен концерт во Националаната опера и балет со почеток од 20 часот. Свое обраќање од НОБ се очекува да има премиерот Димитар Ковачевски
Под мотото „11 март 1943 – Никогаш повеќе” денеска во Скопје со повеќе настани ќе бидат одбележани 80 години од депортацијата на македонските Евреи.
Одбележувањето ќе почне со поворка на живите од Музејот на Град Скопје (Стара железничка станица) до Монопол-Империјал Тобако.
По поворката, најавени се обраќања на шефот на државата Стево Пендаровски, вицепремиерот за економски прашања Фатмир Битиќи, како и претседателот на парламентарната група за пријателство Израел – Северна Македонија, Хамад Амар. Обраќања ќе имаат и Ернест Херцог од Светскиот еврејски конгрес, Мариа Багдасарова од Европскиот еврејски конгрес и Пепо Леви, претседател на Еврејската заедница во земјава.
Во овој временски период на неколку сообраќајници во градот ќе биде воведен посебен сообраќаен режим.
Одбележувањето во 11:30 часот ќе продолжи на Градските гробишта „Бутел“ каде што ќе биде положено цвеќе пред споменикот на депортираните Евреи и пред споменикот на паднатите борци во НОБ.
Одбележувањето ќе се заокружи со комеморативен концерт во Националаната опера и балет со почеток од 20 часот. Свое обраќање од НОБ се очекува да има премиерот Димитар Ковачевски, амбасадорката на Израел, Симона Франкел, претседателот на Еврејската заедница во земјава Пепо Леви и претседавачот на Американскиот еврејски конгрес, рабин Ендру Бејкер.
Настанот за одбележување на 80-годишнината од депортацијата на македонските Евреи е под покровителство на Владата, а во организација на Еврејската заедница во земјава и Фондот на Холокаустот.