Под слоганот „Честит 11 Октомври, секогаш слободни“, земјава денеска ќе го одбележи Денот на востанието на македонскиот народ. Оваа година, како што најавија од Владата, настаните ќе се одржат според здравствени протоколи – без масовни собири, со маски и на растојание.
Премиерот Зоран Заев по повод денешниот празник ќе има обраќање на спомен-костурницата во Куманово. Во делегацијата која ќе ја предводи тој ќе бидат и министерот за внатрешни работи Оливер Спасовски, министерката за труд и социјална политика Јагода Шахпаска и министерот за транспорт и врски Благој Бочварски.
Делегации од Владата ќе има и во Скопје и Прилеп. Првиот вицепремиер Артан Груби, заедно со министерката за одбрана Радмила Шекеринска, министерот за правда Бојан Маричиќ и министерот за здравство Венко Филипче ќе бидат во Скопје. Во Прилеп, пак, делегацијата ќе ја предводи вицепремиерот за европски прашања Никола Димитров, а ќе биде придружуван од министерот за надворешни работи Бујар Османи и министерката за образование и наука Мила Царовска. Тие е положат цвеќе на спомениците на Методија Андонов – Ченто и на Кузман Јосифовски – Питу, Алејата на народни херои, споменикот „Жена борец“ и Могилата на непобедените.
И собраниски делегации денеска на спомен обележјата ќе положат цвеќе по повод 79 години од Денот на почетокот на народното востание. Претседателот на парламентот Талат Џафери во својата честитка порача дека лекциите од минатото треба да се научат за да не се повторат поделбите.
„Денес, го празнуваме 11 Октомври за да им оддадеме почит на сите кои го положиле својот живот за да можеме да ги уживаме благодатите на животот во слободна, силна и демократска држава, со отворен и искрен пристап кон соседите, кон пријателските и партнерски земји и земја членка на НАТО. Лекциите од минатото треба да се научат и да се запомнат, за никогаш повеќе да не се повторат затоа што поделбите никому не носат ништо добро и во овој свет само сплотеноста носи кон прогрес“,
вели Џафери во честитката.