Оставката на досегашниот директор за нас ништо не значи бидејќи тој сам изјави дека состојбата во болницата е очајна и затоа сметаме дека инспекцијата не треба да доаѓа само кога се случуваат трагедии, туку постојано, порачаа битолчани
Правда за Јана и јавно да се соопштат причините за двете трагедии кои се случија во битолската болница побараа денеска битолчани. Тие на мирен протест пред ЈЗУ Клинична болница „Д-р Трифун Пановски“ – Битола со едноминутно молчење и звук на сирена, оддадоа сочувство за починатото новороденче и за шестгодишното девојче Јана.
Граѓаните присутни на протестот порачаа дека е недозволливо во напредна медицина да се случуваат трагедии.
„Сирената е вклучена, а вклучен е и алармот за битолската болница. Недозволиво е во 21 век со толку напредна медицина, на ваков начин да заминуваат нашите најмили. Со едноминутно молчење оддаваме почит за прераната смрт на сите дечиња што ја доживеале судбината на Јана. Оставката на досегашниот директор за нас ништо не значи бидејќи тој сам изјави дека состојбата во болницата е очајна и затоа сметаме дека инспекцијата не треба да доаѓа само кога се случуваат трагедии, туку постојано“,
истакна Игор Петковски, претставник на организаторот на протестот.
Државниот санитарен и здравствен инспекторат (ДСЗИ) по вонредниот иснпекциски надзор во битолската болница поради смртта на новороденчето, соопшти дека прекршочно ќе ги гони битолскиот гинеколог М. В., битолската болница и директорот на болницата за констатирани недостатоци во третманот на 24-годишната родилка од Битола чие новороденче почина во неделата во битолската болница.
На крајот на март шестгодишната Јана почина во битолската болница откако била примена со симптоми на настинка.
Основното јавно обвинителство Битола сè уште не го добило извештајот од обдукцијата на малата Јана, а во меѓувреме работи на обезбедување други докази, изјави пред десетина дена републичкиот јавен обвинител Љубомир Јовески.