Измените на Законот за служба во Армијата предвидуваат и отпремнина по завршување на службата и откуп на стажот за офицерите, но најмногу од амандманите, сепак, се за членот според кој воени лица не смеат да се занимаваат со политика, за што како пример се посочуваше случајот со полковникот Ковачки, кој е член на ИК на ВМРО-ДПМНЕ
Со над 2 000 амандамни, ВМРО-ДПМНЕ го блокира донесувањето на долго најавуваниот нов закон за служба во Армијата. Една од новините во овој закон е забраната воени офицери да бидат политички функционери, за што како пример беше посочуван случајот со полковникот Драган Ковачки, кој е член на Извршниот комитет на ВМРО-ДПМНЕ.
Поради 2 000 амандмани на ВМРО-ДПМНЕ, во Комисијата за одбрана и безбедност денеска не помина во второ читање законот за служба во Армијата, кој, исто така, предвидува и војниците да можат да земат отпремнина по завршување на службата и откуп на стажот за офицерите, покрај забраната за политички активности на воените лица…
„Во петокот ВМРО-ДПМНЕ поднесе 2 000 амандмани, со цел да го блокираат донесувањето на законот за служба во Армијата, со кој се предвидува доплата на стажот на офицерите до пензионирање, како и забраната офицери да бидат членови во политичка партија“,
вели за МИА претседателот на собраниската Комисија за одбрана и безбедност Миле Талески.
Според него, бројката на поднесените амандмани укажува дека целта на опозицијата е да се блокира законот, а најмногу од амандманите се во однос на тоа дека персоналот во служба на Армијата не смее да раководи, да застапува или да претставува политичката партија и да биде член на органите на партијата утврдени со нејзиниот статут.
Министерката за одбрана Радмила Шекеринска, на својот фејсбук профил, објави дека опозицијата со овој потег ги блокира новите поволности за припадниците на Армијата.
„Ги решаваме еден по еден проблемите што ни ги оставија и наместо да помогнат, сега блокираат“,
пишува Шекеринска.
Пратеникот и член на Комисијата Бојан Стојаноски од ВМРО ДПМНЕ, на прес-конференција, истакна дека целта на поднесените амандмани е подобрување на условите за пензионирање и давање можност на активниот воен и цивилен персонал во Армијата да му престане работниот однос по сила на законот со остварување право на пензија со навршување 40 години стаж или со навршување 55 години возраст.
„Доколку ова не биде регулирано како што бараме, ќе се појави контрадикторност и ќе се изгуби смислата од потребата за бенифицираниот стаж“,
појасни Стојаноски и додаде дека предлагаат да се изврши корекција во висината на пензијата и на воениот и на цивилниот персонал на кој од денот на формирање на Армијата до денот на влегување во сила на овој закон им престанал работниот однос.
Се огласи и Независниот синдикат на одбраната кој ги повикува сите чинители веднаш да изнајдат решение за да се донесат измените на Законот кои директно ги засегаат вработените во Армијата.
„Сметаме дека донесувањето на овие измени ќе биде придобивка за вработените, а со тоа ќе се решат децениските проблеми со кои се соочуваа вработените во Армијата, во смисла на решенијата во измените на Законот околу пензионирањето на специфични групи, решавање на проблемот со професионалните војници со навршени 45 години, како добра алтернативна можност и подобри можности за напредок во кариерата и други придобивки во измените на Законот“,
потенцираат од Синдикатот.