Продолжуваат несогласувањата меѓу полковникот од ИК на ВМРО-ДПМНЕ и министерката за одбрана. Ковачки добил дисциплинска мерка за закана кон началникот на ГШ, за што тој вели дека дознал од медиумите
„Се гледаме на суд, одберете си добар тим правници“, ѝ порача полковникот Драган Ковачки, член на Извршниот комитет на ВМРО-ДПМНЕ, на министерката за одбрана Радмила Шекеринска, по веста што ја објави МИА дека тој добил дисциплинска мерка, односно дека е казнет со 30 проценти од плата во траење од шест месеци.
Како што јави МИА, главната военодисциплинска комисија предложила најстрога дисциплинска мерка – губење чин, која предвидува и престанок на работниот однос, но Шекеринска, водејќи се по начелото на сразмерност на казната со вината, ја оценила оваа мерка за престрога, па началникот на Генералштабот, како надлежен старешина, ја донел и спроведе следната пониска дисциплинска мерка.
Главната военодисциплинска комисија, како што се посочува, по иницијатива на началникот на ГШ, расправала за утврдување на дисциплинска одговорност на полковник Ковачки по три основи: Поради испратена порака преку Вибер до началникот на ГШ, во која изнел закани, клевети и обвинувања, политички пост на Фејсбук во кој изнел неосновани обвинувања за врховниот командант на Армијата, претседателот Стево Пендаровски и поради јавните настапи на полковникот при што тој не ги почитувал насоките од Правилото за односи со јавноста на Армијата, усвоено во 2016 година. Меѓу останатите основи по кој е утврдена вина се и „непочитување на редот и дисциплината пропишани со правилата за ред и дисциплина“, како и „постапување спротивно на правилата и прописите за вршење воена служба.
„Главната воено дисциплинска комисија утврдила вина на полковникот Драган Ковачки за сторени повредни по членот 131 став 2 точка 13, 17, 22, 28 и 31 од Законот за служба во Армијата. Еден од основите за кој е утврдена вина е и точката 13 од наведениот член и став, „повреда на достоинството и авторитетот на претпоставен и постар“, бидејќи упатена е закана од полковникот Драган Ковачки кон началникот на Генералштабот, која гласи – „долга е раката на ВМРО“.
изјавиле од МО за МИА.
Ковачки возврати дека од медиуми дознал дека е казнет и дека не добил никакво решение.
„Ми наместија дисциплинска постапка за која комисијата составена од генерали веќе се произнесе дека нема елементи за казна, но Шекеринска дополнително си формира своја комисија во која дури има и лица кои се помали по чин од мене и без нету еден доказ донела решение за да ме казни на плата. Сега ќе си добиете по една тужба и тоа што сте го објавиле ќе мора да го докажете, ама не пред партиска комисија, туку пред суд. Политички гледано, ова е дискриминирачки и очајнички обид на Шекеринска, преку злоупотреба на службената позиција и на целосно незаконски начин да го спречи уставно загарантираното право за јавно изразување и критика на јавните функционери, вклучително и на нејзините поразителни и популистички политики во одбраната“
напиша Ковачки на Фејсбук.
Минатиот месец, Ковачки, поднесе кривични пријави против Шекеринска, обвинувајќи ја дека искористила содржини од класифицирани документи во своја лична и партиски промоција. Тој не кажа за што точно се однесува кривичната пријава. Само посочи дека ова е првпат во историјата на модерна Македонија, министер за одбрана „на незаконски и крајно непрофесионален начин, дрско да ја злоупотреби својата позиција и содржини од класифицирани документи“.
Шекеринска реагираше тогаш дека Ковачки е нервозен затоа што против него се води дисциплинска постапка. Таа посочи и дека наскоро, согласно со измените во Законот за служба во Армијата, Ковачки ќе треба да одлучи „дали ќе ја соблече армиската униформа, бидејќи му е поважна партиската“.