Снежно невреме викендов зафати повеќе земји на Балканот. Србија, Бугарија и Романија се соочија со проблеми во сообраќајот и во снабдувањето со електрична енергија
Фото: EPA-EFE/VASSIL DONEV
Во Србија е вклучен црвен метеоаларм. Снежните врнежи предизвикаа бројни проблеми во сообраќајот, снабдувањето со електрична енергија и комуникациите во повеќе области од земјава, а пожарникарите мораа да интервенираат за да ги евакуираат патниците во локалниот превоз, пренесе „ХРТ.хр“.
Поради обилни врнежи од дожд е прогласена вонредна состојба во руралниот дел на Општина Врање. Жителите беа евакуирани пробивајќи се низ снежните наноси по клучните патишта.
Во близина на градот Соколовац цела ноќ траеше спасувањето патници од еден автобус. Пожарникарите евакуирале дваесет патници од завеан автобус на релација Врање – Крива Феја на југот на Србија. За кратко време наврна околу половина метар снег. Евидентирани се и силни налети на ветер, срушени се и некои електрични столбови, па во околината немало струја. Патиштата се непроодни, цели села отсечени.
Вонредна состојба е прогласена и на територијата на Општина Сјеница.
„Мислам дека е над 30, некаде и до 40 сантиметри. Поради тоа што снегот е влажен, не може ни да се исчисти“,
коментира еден жител на Сјеница.
Во областа Ивањица во западна Србија две лица се спасени од снежните наноси. Обилниот и влажен снег, заедно со силните налети на ветерот, ја сруши далноводната мрежа на подрачјето на Ивањица и Шврљиг, а сообраќајот беше во прекин на многу локални патишта во ридско-планинските делови на Србија, кои беа погодени од снежната бура.
Во Бугарија повеќе од илјада места се исклучени од електричната мрежа, а на многу места е запрен патниот и железничкиот, а некаде дури и авиосообраќајот, пренесоа агенциите.
Поради вонредните временски услови, бугарскиот премиер Николај Денков свика вонреден владин состанок. Состојбата е особено загрижувачка на североистокот на земјата, а без струја остана и дел од населението во Софија.
Во многу делови од земјата врнежите од снег се придружени со силни налети на ветер, па владата прогласи вонредна состојба во неколку региони.
Министерот за одбрана Тодор Тагарев најави дека армијата е во состојба на готовност, а одговорните сѐ уште разговараат како ќе се одржува наставата во најтешко погодените региони, пренесе бугарската новинска агенција БТА.
Аеродромот во Софија работи со доцнења, а неколку меѓународни летови на аеродромот во Варна се откажани.
Снегот и ветерот го попречуваат и патниот и железничкиот сообраќај во Романија, каде што премиерот Марсел Чолаку свика состанок на претставниците на службите за итни случаи.