По исцрпните разговори кои претставниците на Градот Скопје и на Владата ги водеа со синдикатите на скопските пожарникари решен е долгогодишниот проблем со покачувањето на платите на пожарникарите, соопштија градските власти.
Преку измени на правилникот за плати, основната плата на пожарникарите ќе биде зголемена за 20%, согласно со барањата на пожарникарите и добиените судски пресуди за досега неисплатените додатоци.
На пожарникарите ќе им бидат исплатени ретроактивно надоместоците за плата за цела 2020 година, а зголемената декемвриска плата ќе им биде исплатена во почетокот на јануари.
Со овие измени, од следниот месец треба да биде покачена основната плата, а ова решение, кое го нарекоа привремено, ќе важи додека Собранието законски не ги регулира платите на долгорочен рок.
„Најдовме законска форма овој проблем да биде бајпасиран со потпишувањето на денешниот правилник, до донесувањето на законот. Моето инсистирање, и како градоначалник и како претседател на ЗЕЛС, е дека ние мора да имаме законска форма на решавање на проблемот на пожарникарите на ниво на целата држава, бидејќи ова е едно парцијално решение кое се однесува само на противпожарната бригада на Град Скопје. Овие луѓе секојдневно ги ризикуваат своите животи за да ги отстранат опасностите во кои се наоѓаат граѓаните и таа нивна благородна дејност мора да биде опфатена со целосно законско решение“,
рече Шилегов.
Покрај Шилегов, на денешната средба во противпожарната станица во Автокоманда присуствуваа и претставници од синдикатите на скопските пожарникари, од Иницијативниот одбор, Министерството за одбрана и претставник од кабинетот на премиерот Зоран Заев.
- Шилегов не се договори со пожарникарите – тие најавија секојдневни протести
- Владата го„гаси“ револтот на пожарникарите
Денешниот договор доаѓа откако пожарникарите во изминатиот период неколкупати протестираа барајќи исплата на додатоците за опасност при работа по што почнаа и преговори со Градот и со Владата.