Основниот кривичен суд со првостепена пресуда осуди татко на затворска казна од седум години затоа што ја продал ќерка си во Словенија, каде што таа била присилена да се омажи.
Продажбата и присилниот брак се случиле во 2013 година, тогаш девојчето имало 17 години, а сумата за која ја продал таткото била 6.000 евра.
Случајот го открило словенечкото обвинителство од каде што ги известиле македонските колеги кои отвориле истрага за трговија со дете.
„Во текот на истрагата се утврди дека родителите на момчето го договориле бракот и таткото на малолетничката дал согласност невестата да ја даде за пари на човек што првпат го гледа, а кога малолетничката се спротивставила, обвинетиот физички ја нападнал и ја присилил на брак“,
соопштија од обвинителството.
На затворски казни за овој случај уште во декември 2015 година од судот во Марибор, Словенија, биле осудени и сопругот на жртвата и неговите родители.