Скопје на големо се подготвува за пречек на папата Франциск во вторник (7 мај 2019 г.). Камерата на „360 Степени“ денеска (2 мај 2019 г.) регистрираше санирање на дупките на автопатот што од аеродромот води кон главниот град и обратно.
Во исто време, се заменуваа прегорените сијалици на уличното осветлување, се средуваше зеленилото долж булеварот „Александар Македонски“, се бојадисуваа пешачки премини…
Граѓаните што ги анкетиравме на различен начин ги толкуваат овие активности – едни ова ги потсетува на времето кога во Скопје доаѓал претседателот на СФРЈ, Јосип Броз Тито, други велат дека ова треба да се случува секој ден, а трети посакуваат почесто вакви поводи за „градот да ни биде поубав“.
БИЛЕТИ ЗА МИСАТА ДО УТРЕ (3 МАЈ)
Билети за присутво на мисата што во вторник (7 мај) папата Франциск ќе ја одржи на плоштадот „Македонија“ во Скопје може да се подигнат најдоцна до утре (среда, 3 мај). Во центарот на Скопје тоа може да се направи на три локации. Останува можноста за подигнување билет и во сите католички парохии (катедрали) во земјава. Неопходен улов за да се подигне билет е да се приложи важечка лична карта или пасош. Повеќе информации во видеото:
ЦЕНТАРОТ НА СКОПЈЕ ПОД ПОСЕБЕН РЕЖИМ НА 7 МАЈ
Движењето во централното подрачје на Скопје ќе биде под посебен режим во вторник (7 мај) – и за пешаците и за возилата. Забрането е движење со возило во целиот радиус на „Голем ринг“. За пешаците ќе има два круга на безбедносни проверки: 1) при влез во „Мал ринг“ (неопходна ќе биде лична карта или пасош); 2) при влез на самиот плоштад заради присуство на мисата (неопходни ќе бидат билет и лична карта или пасош). Како ќе функционира посебниот режим од 6 до 19 часот на 7 мај, повеќе во видеото:
ВЛАДА: ВО ВТОРНИК КОРИСТЕТЕ ГРАДСКИ АВТОБУС
Од Владата апелираат граѓаните навреме да го планираат времето за движење во центарот на Скопје за врема на посетата на папата Франциск во вторник следната недела.
Портпаролот Миле Бошњаковски вели дека се обезбедени сите услови за непречено одење на работа и за функционирање и на јавниот и на приватниот сектор со оглед дека 7 мај е работен ден.
Во центарот на Скопје во вторник од 6 до 19 часот ќе има забрани и ограничувања во сообраќајот кој ќе се пренасочува по бул. „Кочо Рацин“, „11. Октомври“, „Свети Кирил и Методиј“, „Св. Климент Охридски“, „Партизански одреди“, „Самоилова“ и бул. „Гоце Делчев“.
Граѓаните што живеат во централното градско подрачје, ако сакаат да ги користат своите возила на 7 мај, треба да ги изнесат претходниот ден надвор од главната зона, зашто тој ден не ќе можат.
Бошњаковски апелираше сите граѓани што живеат на територијата на град Скопје да користат градски автобуски превоз, кој во вторник ќе биде бесплатен за сите.
-За сите граѓани движењето пеш низ Скопје ќе биде непречено, без разлика каде живеат и каде работат. Сите граѓани кои работат во центарот Скопје, кој ќе биде затворен за сообраќај, ќе можат непречено да влегуваат, без разлика дали одат или не на миса, што значи дека движењето е непречено. Потребно е да имаат лична карта за идентификација и бидејќи е отежнато севкупното движење, да го испланираат времето и да тргнат половина час порано на работа или каде било и да се упатуваат. Ќе им биде потребно подолго време да пристигнат, но непречено ќе се движат, рече Бошњаковски.
МАПА: ДЕТАЛЕН ПРИКАЗ НА ПРАВИЛАТА ЗА ДВИЖЕЊЕ
Повеќе на papa.mk