Борбата е за квалитетни услови на уметничка креација која не спаѓа во ексклузивно популарната сфера, за градските институции да не си играат со уметниците и оние кои го овозможуваат нејзиниот процут, порачаа од колективот Гола планина во најавата за денешниот протест
Стотици млади денеска се собраа на музички настан пред Младинскиот културен центар (МКЦ) во Скопје за одбра на култното место и за го искажат револтот во врска со случувањата во изминатиот период како што се назначувањето на нов директор од страна на градоначалничката Данела Арсовска и кратењето на буџетот од градската власт.
На настанот настапија 10-тина музички групи и соло изведувачи кои ја изразија својата поддршка за МКЦ кој важи за симбол на независната култура во Скопје.
Меѓу нив беше и позната Дина Јашари.
„Тука сум порасната. Во МКЦ од мала имам свирено во мандолинскиот оркестар и сега се занимавам со авторска музика, цело време настапувам, на 50-годишнината на МКЦ … Ова е многу важно место за мене и сметам дека е голема неправда тоа што се случува и нема место за политика во културата“,
изјави младата музичарка, пренесе Радио Слободна Европа (РСЕ).
Настанот беше најавен преку социјалните мрежи од колективот Гола планина како собир за сите ентузијасти и љубители на независната култура.
„Борбата е за квалитетни услови на уметничка креација која не спаѓа во ексклузивно популарната сфера, за градските институции да не си играат со уметниците и оние кои го овозможуваат нејзиниот процут, бидејќи инаку ќе згасне младата уметничка експресија. Се бориме за сите оние фестивали и концерти во МКЦ кои се случиле во последниве 50 години и сите оние кои сакаме да се случуваат во иднината. Се бориме за сите спомени (остварени и сè уште неостварени), за минатото и за иднината. Срамота е да се скрати буџетот на МКЦ за 92%! Срамота е форсираното политизирање на една од најлегитимните и најработливите културни установи во Македонија.Срамота е постојаниот обид за угнетување на оние кои уживаат во правење и восприемање на уметност различна од популарната, посебно на младите кои се борат за трошките“,
пишуваше во најавата за настанот насловен „Сите за МКЦ“.
МКЦ од оваа недела има нов директор. Во средата (18 јануари) од кабинетот на градоначалничката Данела Арсовска објавија дека неколку градски институции добиле нови раководства меѓу кои и МКЦ на што истиот ден реагираше и Програмскиот колегиум.
Од програмскиот колегиум реагираа дека МКЦ повторно е мета на партиски игри и рекоа дека досегашниот директор, Ванчо Богоев, е разрешен бидејќи не сакал да потпише за вработување на Бени Шаќири во МКЦ, за што трпел и притисоци од генералниот секретар на Град Скопје, Зоран Глигоров.
Новиот в.д. директор, Никола Алексов, реагираше Програмскиот колегиум, е дипломиран детектив, бил примен во МКЦ преку Агенцијата за привремени вработувања два дена пред да биде назначен на функцијата и нема никакво искуство и заднина во културата.