Во пресрет на утрешната средба, синдикалниот претседател Ангел Ристов вели дека очекува да се постигне договор со кој ќе се остварат повеќегодишните барања за потпишување колективен договор на ниво на работодавец, како и унапредување на правата од работен однос и покачување на платите на вработените во Универзитетот
Откако Министерството за труд и социјална политика (МТСП) го прифати барањето за помирување, претставници на Сојузот на синдикати на УКИМ утре во Ректоратот на Универзитетот ќе одржат средба со одборот за преговори предводен од претседателот на Собранието Талат Џафери по однос на барањата на Синдикатот за склучување новиот колективен договор и зголемување на платите на вработените.
Средбата ќе се одржи врз основа на барањето на Синдикатот на УКИМ за мирно решавање колективен спор со посредство на помирувачот, адвокатката Мимоза Салтирова, согласно Законот за мирно решавање на работните спорови.
„Со оглед на прифаќањето на предлогот за мирно решавање на спорот од страна на Собранието, како основач на Универзитетот ‘Св. Кирил и Методиј’ во Скопје, очекуваме да постигнеме договор со кој ќе се остварат нашите повеќегодишни барања за потпишување колективен договор на ниво на работодавец – УКИМ, унапредување на правата од работен однос и покачување на платите на вработените“,
се наведува во дописот од Ангел Ристов, претседател на Сојузот на синдикати на УКИМ.
Ристов пред помалку од еден месец информира дека најпосле, по две години борба, е прифатен предлогот за помирување и очекува во кус рок да биде решен спорот и да се потпише колективниот договор.