Управата за јавни приходи (УЈП) да изврши присилна исплата на платите, а компаниите да бидат казнети, бараат повеќе здруженија и синдикати, кои реагираат на информациите што вчера ги откри директорката на УЈП, Сања Лукаревска, дека одредени фирми и покрај тоа што добиле државна помош не ја исполниле обврската за плати на своите вработени.
„Силно ги осудуваме сите работодавци кои примиле финансиска поддршка од државата, а не ја исполниле обврската за исплата на плати на своите вработени. Целта на државната финансиска поддршка утврдена со владината Уредба за справување со кризата предизвикана од ковид-19 беше да се зачуваат работните места на работниците, а не работодавците незаконски да профитираат на грбот на работниците за време најголемата здравствена, социјална и финансиска криза со која се соочуваме. Сметаме дека ваквото однесување на работодавците е недозволиво, неправедно, незаконско и нехумано“,
пишува во соопштението.
Здруженијата и синдикатите бараат УЈП без одложување и во најкус можен рок, согласно своите законски овластувања, да изврши присилна наплата на платите на работниците во фирмите кои добиле државна финансиска поддршка, а не ја исполниле обврската. Исто така, бараат УЈП, во соработка со Државниот инспекторат за труд, а согласно Законот за придонеси од задолжително социјално осигурување, на тие работодавци да им изрече глоба за сторен прекршок и да ги задолжи да ги вратат добиените државни финансиски средства.
„Бараме Основното јавно обвинителство да покрене постапка по допрен глас против сите работодавци кои добиле државна финансиска поддршка, а не им исплатиле плати на своите работодавци за сторено кривично дело измама по чл. 247 од Кривичниот законик. Владата како носител на мерката и исплатувач на државната финансиска поддршка јавно да ги објави фирмите кои ја користеле државната финансиска поддршка, а не им исплатиле плати на своите вработени“,
бараат синдикатите и здруженијата.
Во иднина, предлагаат оттаму, сите финансиски мерки за помош и поддршка на работниците да им се исплаќаат директно на работниците, а не на работодавците, за да се избегнат вакви и слични злоупотреби.
Зад ова соопштението стојат Конфедерација на синдикални организации на Македонија (КСОМ), Синдикат на работниците од управата, правосудните органи и здруженијата на граѓани (УПОЗ), Независен академски синдикат (НАкС), Самостоен синдикат на новинари и медиумски работници (ССНМ), Синдикат на културата на Република Македонија (СКРМ), Синдикат на македонската дипломатска служба (СМДС), Хелсиншки комитет за човекови права, Здружение на граѓани „Гласен текстилец“, Левичарско движење „Солидарност“, ЈАДРО – Асоцијација на независната културна сцена и Субверзивен фронт.