Оган, поранешен академик, на претседателските избори беше кандидат на сојузот на десничарските партии предводени од Партијата на победата, која е позната по своите антиимиграциски ставови во Турција. На првиот круг од претседателските избори тој освои само 5,2 отсто од вкупниот број на гласови
Педесет и петгодишниот Синан Оган, кој го освои третото место по добиени гласови на претседателските избори во Турција, најави поддршка за актуелниот претседател Реџеп Таип Ердоган во вториот круг од изборите што ќе се одржи на 28 мај, јави Ројтерс.
„По нашите внатрешни дискусии, сакам да објавам дека ќе го поддржам господинот Реџеп Таип Ердоган во вториот круг. Ги повикувам и моите гласачи да го поддржат господинот Ердоган“,
рече Оган на денешната прес-конференција.
Националистичкиот кандидат ја објави својата одлука неколку дена пред вториот круг од изборите на кои Турците ќе одлучат дали Ердоган или лидерот на опозицијата Кемал Киличдароглу ќе ја водат земјата во следните пет години.
Фото: EFE/PRESIDENT PRESS OFFICE HANDOUT
Во првиот круг од изборите кои се одржаа на 14 мај, Ердоган освои 49,5 отсто од гласовите и за малку не победи, а Киличдароглу, кандидатот на шестпартискиот опозициски сојуз, освои 44,8 отсто од гласовите.
Оган, поранешен академик, беше кандидат на сојузот на десничарските партии предводени од Партијата на победата, која е позната по своите антиимиграциски ставови во Турција. На првиот круг од претседателските избори тој освои најмалку гласови – 5,2 отсто.