Говорот на Апасиев не ниту фашизам ниту нацизам, туку метафора. Пазете, кај него, кај академик Ќулавкова, а едно време и во Ванковска, пронајдоа националисти кои шират говор на омраза
Идната пратеничка на ВМРО-ДПМНЕ во новиот парламентарен состав, Гордана Силјановска, укажува дека е реално да се очекува и ВМРО-ДПМНЕ да влезе во битката за составување парламентарно мнозинство.
„Сега се покажа дека ВМРО-ДПМНЕ добро постапи со тоа што и покрај победата на изборите во 2016-та не формираше влада, затоа што не прифати отстапки. Нашиот Устав вели, мандатот го добива оној што ќе собере 61 пратеник а јас се надевам дека Претседателот ќе го побара тоа, за да не влеземе како тогаш во една истоштувачка и неизвесна игра. По изјавата на Левица дека нема да влезе во Влада, но дека нема да поддржи Влада на СДСМ, можеби веќе во стартот, ако ВМРО-ДПМНЕ добие поддршка од тие двајца пратеници, „трчањето“ кон целта ќе биде со еднакви шанси“,
изјави Силјановска.
Ливчињата на кои е чкртната Северна, а е гласано за една партија да се уважат
Во интервју за ТВ Алфа, идната пратеничка на ВМРО-ДПМНЕ, Гордана Силјановска, изрази очекување Управниот суд да ја уважи тужбата во која се бара да се признаат за важечки ливчињата во кои е чкртаната Северна а било гласано за една партија.
„Јас одговорно тврдам дека сите ливчиња на кои што е пречкртана Северна, но јасно се изразила волјата со заокружување една партија, треба да се смета како важечки глас. Според Изборниот законик, кога се утврдува важноста на гласот, се тргнува од можноста за слободно изразување на волјата, дури човек може да рече, дека во овој случај, со таквиот чин, не само што се потврдува туку и се зајакнува волјата, бидејќи гласа против партија која била против Северна. Очекувам Управниот суд да ги селектира и провери ваквите ливчиња, а сигурно има, оти ако имате над 30 илјади неважечки ливчиња, тоа се многу мандати“,
вели Силјановска.
Јас сум доказ дека Мицкоски е демократ
Носителот на листата на ВМРО-ДПМНЕ во првата изборна единица смета дека постојат и низа други аргументи, освен математичките, кои укажуваат дека лидерот на оваа партија треба да го добие мандатот за формирање влада.
„Причина плус е и реформската програма, изразито реформската програма, поради внатрепартиската демократија која има правен основ во Статутот, па и ако ги гледате листите ќе видите дека таму има многу нови луѓе и само осуммина се од претходниот состав. Меѓу нив и членови кои не се од партијата и луѓе кои првпат се занимаваат со политика. И да бидеме искрени, може колку сакаат да го критикуваат господин Мицкоски, меѓутоа ние за прв пат имаме професор, учител, претседател на партија, човек – за кој секогаш знаењето било сила и моќ, од прво одделение, па до завршување на факултетот. И на крај, демократ. Јас сум доказот за тоа“,
рече Силјановска во интервјуто.
Таа, речиси ја исклучува можност за формирање широка коалиција, поради, како што нагласи, лошите искуства со преодната влада.
„Последната варијанта која за вакви тешки времиња би била логична, ама по искуството со преодната Влада имам дилеми, е да се направи некаква влада на широка коалиција. Но, само ако во неа влезат не партиски војници, туку квалитетни и докажани луѓе“,
вели таа.
Заев не е СДСМ, каде се Црвенковски, Куновска, Астеруд, Бендевска
Осврнувајќи се на своите политички противници, Силјановска во интервјуто оцени дека Заев не е синоним за СДСМ, подвлекувајќи дека без препознатливите кадри, оваа партија е во идеолошка криза.
„Најдоброто од СДСМ го нема. Дружината на Заев, на чело со него е далеку од тоа да персонифицира социјалдемократија. Синоним за социјалдемократија е да имате чувство за солидарност, за хуманизам, за јавни работи, за социјална држава. Сетете се кои фирми беа помогнати кога се соочивме со ковид-19. Малите, средните, микрофирмите или сиромашните? Не! Нему сличните. Си замислувам каков ли ќе беше СДСМ со претседател како Зоран Јовановски или Гордан Георгиев? Каде се Софија Куновска, Каролина Ристова-Астеруд, Весна Бендевска? Ако сакате и Бранко Црвенковски, бидејќи не можам а да не кажам дека Бранко Црвенковски бил првенец во мојата гимназија Георги Димитров, еден од најдобрите студенти, урбан лик кој соодветствува на социјалдемократската идеологија, која денеска е во голема криза“,
појаснува Силјановска.
Да се истражи фамилијаризацијата во економијата, здравството и во образованието
Говорејќи за системските проблеми на државата, Силјановска се осврна на недостигот на квалитетни кадри, а како причини ги наведе семејните стебла кои се разгранети во сите сфери на општеството.
„Во Македонија и на Балканот, во економијата, здравството и во образованието има фамилијаризација. Новинарите треба да истражат. Сите претседатели на партииве, или министри или пратеници, кого имаат на државниот буџет? Ќе се шокирате. Таму каде што нема натпревар на ум и знаење, не може да има просперитет“,
вели Силјановска.
Медиумите и невладините се дел од мрежата на Заев
Според идната пратеничка од редовите на ВМРО-ДПМНЕ, не постои јавна критика, освен од опозицијата, на работата на Зоран Заев бидејќи тој, како што вели таа, си ја купил партијата па преку неа тргнал во олигархиска битка во која се создало мрежно управување од најлош тип.
„Дури и дел од новинарите се во таа мрежа. Невладините организации исто. Видовме ние, 500 илјади евра да доделите на 40 невладини организации за проекти во 5 минути пред избори, многу значи. Примери има и од Шарената револуција. Еден од нив, од кој беше дел од невладиниот сектор, стана потпретседател на партијата. Кога куче чувар ќе го врзете или наградите, тоа нема да лае. Значи се изгубија механизмите на контрола. Медиумите исто така. Вие имате медиуми кои оди пишуваат за господинот Заев. Поезија може да објават“,
вели таа.
Таа на медиумите им забележува и за тоа што не ги канеле на предизборни соочувања помалите партии, но и го дисквалификува однесувањето на некои од водителите на дебатите.
„На телевизиските соочувања, немаше како во 90-те години претставеност од сите партии, без оглед дали се мали или големи, ниту прашања од ист тип, туку некои новинари правеа научни дебати а некои беа и во класичен конфликт на интерес, да бидам искрена. Сигурно дека и Димитар Апасиев, Солза Грчева или некој друг лидер, можеа да бидат вклучени во дебатите. Како дојде до тоа, навистина не знам. Тоа е дискриминација“,
смета Силјановска.
Апасиев не е фашист, тоа што го говори е метафора
За Силјановска, не постои никаква опасност од реториката која ја користи првиот човек на Левица.
„Далеку е, смешно е, некој како да сака да воведе вербален деликт. Мене не ми личи неговиот говор така. Ама ним им личи. Фашизам, нацизам во таков говор, тоа се глупости. Тоа е метафора. Кога некој ви вели, ќе ви направам ова, не мисли, а прво и не може бидејќи е во таква позиција, туку, тоа мисли на аргументи, на зборови и т.н. Тоа ја покажува фрагилноста, фрустрираноста на власта, но она што повеќе ме плаши мене, невладиниот сектор, особено оној дел кој треба да се грижи за слободите и правата, пазете во Апасиев и во академик Катица Ќулавкова, а едно време и во Билјана Ванковска, пронајдоа националисти кои шират говор на омраза“,
е оценката на Силјановска.