За време на заедничката прес-конференција со шефот на македонската дипломатија Бујар Османи, унгарскиот министер за надворешни работи истакна дека вистинските преговори со С Македонија треба да почнат веднаш и да завршат што е можно побрзо
Тие што го блокираат стартот на преговорите на Северна Македонија со Европската Унија треба да знаат оти го поткопуваат и кредибилитетот на Унијата, порача унгарскиот министер за надворешни работи и трговија Петер Сијарто, кој е во работна посета на земјава.
За време на заедничката прес-конференција со шефот на македонската дипломатија Бујар Османи, тој истакна дека местото на Западен Балкан е во ЕУ, а оти вистинските преговори со С Македонија треба да почнат веднаш и да завршат што е можно побрзо.
„Но, сè уште има земји што го успорувааат и поставуваат пречки на овој процес. Страшно е што Бугарија го блокираше писмото кое требаше да се испрати на С Македонија пред неколку недели. С Македонија има кандидатски статус веќе 18 години и не може да ги започне преговорите, а тоа покажува непочитување кон земјата. Ова е котнрадикторно на интересите на ЕУ“,
рече Сијарто.
Унгарскиот министер оцени дека Унијата е сериозно ослабната, а оти првиот чекор кон сопирање на таквото ослабнување е моментот на признавање дека ЕУ има потреба од свежата енергија од Западниот Балкан.
Сијарто потенцира дека кога Унгарија ќе го преземе претседавањето со ЕУ ќе направи сè за да се овозможи пристапувањето на Северна Македонија и на целиот Западен Балкан во Унијата.