Договорот потпишан од Стокхолм и Вашингтон во декември им овозможува на американските сили пристап до 17 шведски одбранбени бази и складирање на воена опрема, оружје и муниција
Шведскиот парламент со големо мнозинство го одобри договорот за воена соработка со САД.
Договорот за одбранбена соработка (ДЦА) потпишан од Стокхолм и Вашингтон во декември беше одобрен од 266 од вкупно 349 пратеници, со 37 гласа против и 46 отсутни.
Договорот потпишан од Стокхолм и Вашингтон во декември им овозможува на американските сили пристап до 17 шведски одбранбени бази и складирање на воена опрема, оружје и муниција.
Тоа се и воени аеродроми и воени бази, како и локации низ целата земја за копнени сили каде што САД ќе можат да распоредат воен персонал и материјал и да вршат вежби.
Критичарите на договорот, како што пренесуваат шведските медиуми, велат дека тој требало да предвиди дека присуството на нуклеарно оружје ќе биде забрането во Шведска.
„Сакаме законот да забрани нуклеарно оружје да влезе на шведска територија. За жал, владата одлучи да потпише договор што не ја затвора вратата за нуклеарно оружје, а Партијата на зелените ќе гласа против овој договор“,
рече пратеничката на Зелените, Ема Бегингер, за време на дебатата во парламентот.
Од владата на премиерот Улф Кристерсон, поддржана од шведските демократи, велат дека договорот го почитува суверенитетот на Шведска.
„Многу е јасно дека Шведска е суверена држава и ниту една земја нема да може да ја натера Шведска да има нуклеарно оружје на нејзина територија“,
рече министерот за одбрана Пал Џонсон за време на дебатата.
За да биде усвоен договорот требаше да го одобрат најмалку три четвртини од пратениците кои гласаа на денот на гласањето и повеќе од половина од вкупно 349 во Собранието.
Шведска, која беше воено неврзана долги години, аплицираше за членство во НАТО заедно со нејзиниот сосед Финска по целосната инвазија на Русија на Украина и се приклучи на западната одбранбена алијанса на 7 март.