Одлуката за укинување на благите мерки се заснова на високата стапка на имунизација и ниската стапка на смртност од ковид. До 7 септември, 70 проценти од возрасната популација во Шведска примиле две дози од вакцината, а вкупно 81,6 проценти од граѓаните над 18 години добиле барем една доза, објавија здравствените власти на прес-конференција
Шведска од 29 септември ќе ги укине речиси сите преостанати епидемиолошки мерки, објавија синоќа министерката за јавно здравје и социјална заштита, Лена Халенгрен, и директорот на Институтот за јавно здравје, Јохан Карлсон.
Одлуката за укинување на мерките се заснова на високата стапка на имунизација и ниската стапка на смртност од ковид. До 7 септември, 70 проценти од возрасната популација во Шведска примиле две дози од вакцината, а вкупно 81,6 проценти од граѓаните над 18 години добиле барем една доза, објавија здравствените власти на прес-конференцијата.
Шведска има трета најниска стапка на смртност од ковид во Европа во последните две недели, по Лихтенштајн и Словачка, и оваа ситуација трае од почетокот на летото.
„Благодарение на успешната кампања за вакцинација, изминавме долг пат и сега нашето општество е во подобра ситуација. Затоа правиме чекор кон нормален секојдневен живот, кон заедница во која нема да има ограничувања. Проценивме дека ограничувањата имаат мал ефект врз контролата на инфекцијата. Во моментов, важно е да се зголеми стапката на вакцинација“,
рече Халенгрен.
Од 29 септември нема да има повеќе ограничувања за бројот на учесници на јавни собири, како што се концерти или натпревари. Од 15 мај, бројот на учесници беше ограничен на 3 000 на отворено и 300 во затворен простор. Укинати се и ограничувањата за приватни собири во затворени простории, на кои досега не можеа да присуствуваат повеќе од 50 луѓе.
Можеби најизненадувачки е повлекувањето на препораката за работа од дома, што значи дека многу компании, јавни и државни институции ќе ги повикаат вработените да се вратат во своите канцеларии по една и пол година.
„Се покажа дека вакцините се ефикасни. Имаме добра покриеност за вакцинација и јасно го гледаме нејзиниот ефект, бидејќи имаме најниска стапка на смртност во Европа. Ограничувањата што сега ги укинуваме веќе не можат да бидат оправдани од гледна точка на јавното здравје. Вакцинираните луѓе од 29 септември, во принцип, можат да живеат како порано, додека невакцинираните луѓе ризикуваат сериозна болест“,
рече Карлсон.
Во Шведска дневниот просек на заразени е малку повеќе од 1 000 нови случаи. Според официјалните лица, претежно невакцинирани луѓе се разболуваат, така што интензивната кампања за вакцинација продолжува на сите возрасти, особено кај тинејџерите од 16 до 18 години.
Сертификатот за ковид-статусот ќе се користи само за преминување на државната граница.