Поранешната министерка за животна средина вели дека власта предводена од СДСМ претходно придонела за намалување на концентрациите на штетните честички ПМ 2,5 во воздухот за 564 kg на годишно ниво и намалување на честичките МП 10 за 735 kg на годишно ниво
Наместо приоритет да биде борбата против загадувањето, власта не презема никаква мерки. Ветија една милијарда евра инвестиции и намалување на загадувањето за 50 отсто, а нема ништо од тоа.
Ова е реакцијата на потпретседателката на СДСМ и поранешна министерка за животна средина, Каја Шукова.
„Од кредитот од Унгарија вреден 250 милиони евра власта не намени ниту едно евро за да го намали загадувањето на воздухот. И ова е уште една потврда дека власта нема намера ништо да преземе. Дополнително, власта ги намалите парите во буџетот за борба против загадениот воздух и има 0 денари предвидено за програмите кои функционираа со години“,
рече Шукова на прес-конференција.
Таа вели дека власта предводена од СДСМ претходно придонела за намалување на концентрациите на штетните честички ПМ 2,5 во воздухот за 564 kg на годишно ниво и намалување на честичките МП 10 за 735 kg на годишно ниво.
СДСМ преку Шукова предложи нов сет мерки, фокусирани на ингеренциите на локалните власти:
– Општините да донесат програми за субвенција за набавка на еколошки системи за затоплување во јавните објекти, субвенции за набавка на велосипеди, субвенции за чистење на оџаците, за набавка на топлински пумпи, сончеви колектори, инвертер-клима уреди и други чисти технологии
– Да набават и да постават прочистувачи на воздух во сите градинки и општински училишта.
– Да инвестираат во филтри на прозорците на училиштата и градинките кои се непропустливи за штетните честички ПМ 10 и ПМ 2,5.
– Општините да им помогнат на социјално загрозените семејства при набавка на енергенс за затоплување – посебна програма за субвенционирање.
– Да се спроведе план за интензивно зазеленување на јавните површини (по примерот на локалната власт во Скопје кога беа обезбедени нови 300 000 квадратни метри нови зелени површини во Град Скопје).
– Во Скопје, конкретно, да се набават нови еколошки автобуси за Град Скопје. 25 пати не е донесена одлуката за набавка на нови еко автобуси за Град Скопје на Советот затоа што советниците на ДПМНЕ гласаат против.
– Да се вршат редовни контроли на инсталациите со Б-интегрирана дозвола и контроли на градилиштата, дали изведувачите спроведуваат мерки за миење на тркалата.
– Интензивно миење на улиците, редовно собирање на отпадот и чистење на дивите депонии од страна на јавните комунални претпријатија.
– Да се започне постапката за носење закон за комунална полиција, а не тој да се користи како популизам.
– Локалните власти на граѓаните да набавуваат еколошко таканаречено суво дрво за огрев.
„Борбата против загадениот воздух е долг процес кој бара континуирана посветеност, стратегиски и конкретни мерки од власта и институциите за намалување на загадувањето. Локалната и централната власт на ДПМНЕ нека ги прифати предлог-мерките на СДСМ и нека ги реализира во целост“,
повика Шукова од партиското седиште.