Шукова потврди дека државниот инспекторат за животна средина започнал со истрага, а резултатите ќе бидат познати најдоцна до вторник. Во моментов, како што рече министерката, се работат хемиски анализи, по што ќе се знае за каков отпад станува збор и колку е тој опасен
Министерката за животна средина и просторно планирање Каја Шукова најави пријави за одговорните во случајот со депонирање на опасен отпад од оловна згура во близина на реката Лепенец, а се чека на хемиските анализи кои се во тек.
Шукова потврди дека државниот инспекторат за животна средина започнал со истрага, а резултатите ќе бидат познати најдоцна до вторник. Во моментов, како што рече министерката, се работат хемиски анализи, по што ќе се знае за каков отпад станува збор и колку е тој опасен.
„Додека не ги добиеме официјалните лабораториски резултати, може само да шпекулираме и би оставила рок за уште два-три дена. Иако првично работите упатуваат во таква насока дека се работи за опасен отпад. Сè ќе биде познато до понеделник-вторник кога и официјално ќе дадеме изјави. Она што засега се знае, според информациите од Државниот инспекторат, е дека таму се работело надвор од законите. За тоа ќе има и пријави и нема да дозволиме такви прекршувања. Документацијата ја прегледуваат и од Инспекторатот и ние како министерство проверуваме со кои дозволи располага компанијата“,
рече Шукова денеска одговарајќи на новинарско прашање при посетата на Дојран каде присуствуваше на почетокот на санацијата и реконструкцијата на колекторскиот систем и изградба на нова пречистителна станица.
За случајот со оловна згура на брегот на реката Лепенец на територијата на општина Ѓорче Петров беше отворен предмет за инспекциска постапка. Од локалната самоуправа во неделата информираа дека при редовна обиколка на територијата на Општина Ѓорче Петров од овластен инспектор за животна средина било лоцирано одлагање згура од преработка на акумулаторски батерии во близина на село Орман, во количина од проценети околу 500 до 600 тони.
Како што информираа тогаш од Државниот инспекторат за животна средина (ДИЖС), отпадот бил лоциран минатата недела.
Од ДИЖС посочија дека според затекнатата состојба на теренот и проценка за ризикот, овластениот инспектор за животна средина по службена должност започнал инспекциска постапка и притоа издал решение со кое им се наредува на сопствениците на земјиштето дислокација на опасниот отпад од катастарските парцели во село Орман на соодветна локација за тоа во рок од 30 дена од денот на приемот на решението.
Од локалната самоуправа информираа дека на нивна територија не постои фирма со А-интегрирана дозвола што преработува ваков тип отпад.