„Секој секого прашуваше што се случува“, вака ја опиша Кирил Божиновски атмосферата на осмиот кат во белата палата на критичниот ден
Поранешниот технички премиер Емил Димитриев, пак, сведочеше дека ВМРО-ДПМНЕ по 27 април 2017 година веќе ја немала истата поддршка од сестринските партии во Европската народна партија
Со неколку сведоци, одбраната на обвинетите ексминистри Спиро Ристовски и Миле Јанакиески за организацијата на настаните од 27 април 2017 година, денеска во судница настапи со цел да го дискредитира Александар Василевски-Нинџа.
Нинџа е осуден со првостепена пресуда во првиот судски процес за крвавиот четврток и таму, но и во случајот за организаторите, сведочеше дека од 8. кат во централниот штаб на ВМРО-ДПМНЕ се координирало на критичниот ден.
Кирил Божиновски, Иво Котевски и Луке Галевски беа меѓу сведоците кои по предлог на одбраната зборуваа што се случувало ноќта на 27 април 2017 година.
Тогашниот генерален секретар на Владата, Кирил Божиновски, сведочеше дека во попладневните часови се упатил кон штабот. Прво бил на петтиот кат, а потоа од петтиот се упатил на осмиот кат.
„На осмиот кат имаше огромна врволица, имаше над 150 луѓе, тоа беше во периодот околу 9-10 часот вечерта. Спонтано се собираа, веројатно заради настаните, секој секого прашуваше што се случило. Беше конфузно. Знам дека таму ги видов и Спиро Ристовски и Миле Јанакиески и други поранешни функционери“,
рече Божиновски.
Меѓутоа, наспроти тврдењето на Нинџа, сведокот рече дека не ги видел ниту Чавков ниту Нинџа. За последниот рече дека го видел на телевизија и слушал негативни работи.
Во слична насока беше и сведочењето на Иво Котевски, како тогашен директор на Центарот за комуникации на ВМРО-ДПМНЕ. Тој кажа дека дента бил во својата канцеларија во штабот, каде што дошол и Ристовски, а потоа се качил на осмиот кат.
„После 17 часот, во мојата канцеларија дојде Спиро Ристовски со кого дискутиравме околу протестите и се сеќавам дека заедно следевме на телевизија што се случува. Мојата канцеларија се наоѓа на вториот спрат. Не можам да кажам точно колку остана Спиро, знам дека околу 20:30 часот јас се упатив на осмиот кат, бидејќи голем број членови и симпатизери доаѓаа во штабот. Кога се качив, веќе беше прилично исполнет осмиот кат. Имаше можеби стотина луѓе присутни. Знам дека беа и поранешните министри Зоран Ставрески, Владо Пешевски, Никола Тодоров… Мислам дека се качи и Спиро Ристовски, а мислам таму беше и Миле Јанакиески“,
сведочеше Котевски, кој рече дека додека бил со Ристовски не слушнал дека тој комуницира со некого за да поттикне учество во упадот во Собранието.
На прашање потоа од судијата Илија Трпков што правеле луѓето на осмиот кат, Котевски одговори дека главно гледале на телевизија што се случува во Собранието и најголемиот дел од нив биле загрижени и во шок.
И актуелниот директор на Центарот за комуникации на ВМРО-ДПМНЕ, а тогашен советник во Владата, Луке Галевски, сведочеше за слични околности, односно дека имало голем број луѓе на осмиот кат и биле во шок и неверување, а за Нинџа рече дека не го знае лично, туку од медиуми и дека не го видел таму.
Судијата и него го праша како е можно партијата да не одржи состанок кога се случува таков настан во државата, а тој зборуваше дека нема сознанија дека се одржале некаков состанок и координација, туку дека по полноќ имало седница, за што потоа имало и прес-конференција.
За да го побијат исказот на Нинџа, адвокатите го прашуваа Кирил Божиновски и за неговите познанства со организаторите на протестите „За заедничка Македонија“, во контекст на исказите на Нинџа дека зеле пари од ВМРО-ДПМНЕ, а Божиновски сега негираше дека имал каква била комуникација за протестите и за нивно финансирање со Игор Дурловски, Владо Јовановски, Богдан Илиевски-Бетмен и Борис Дамовски.
Претходно денеска сведочеа и Митко Чавков и Никола Митревски-Кољо, осудени со првостепена пресуда во првиот судски процес, за кои адвокатот Еленко Миланов рече дека смета оти го дискредитираат сведочењето на Нинџа, на чиј исказ, според него, не може да се заснова пресуда.
Обвинителката Вилма Русковска немаше прашања за сведоците, единствено го праша Иво Котевски дали, како што кажал дека формално-правно Центарот за комуникации на ВМРО-ДПМНЕ не фигурирал како посебно тело, може да се заклучи и дека партијата формално-правно не ги поддржала протестите, иако всушност стоела зад нив.
Котевски, пак, ѝ одговори дека на седниците на Извршниот и Централниот комитет, каде што присуствувал како гостин, немало никаква одлука.
Димитриев: ВМРО-ДПМНЕ ја загуби меѓународната поддршка
Како сведок денеска се појави и тогашниот генерален секретар на ВМРО-ДПМНЕ и технички премиер Емил Димитриев, кој рече дека партијата немала одлука на седниците на Извршниот и Централниот комитет за да ги поддржи протестите.
Во тој период, рече Димитриев, со задоволство чекал да се формира нова влада за да ја предаде власта бидејќи, како техничка влада и со нефункционално Собрание, не можеле да работат ништо суштински.
За крвавиот четврток оцени дека донел загуби за ВМРО-ДПМНЕ.
Пред 27 април 2017 г., се потсети експремиерот, во Малта бил на состанок и на средби со сестринските партии од Европската народна партија. Со оглед на изборниот резултат од парламентарните избори во декември 2016 г. тој рече дека на состаноците и брифинзите во Малта ВМРО-ДПМНЕ добила недвосмислена поддршка да формира влада или да влезе во коалициска влада со опозицијата, но…
„После 27 април, можам да кажам ја немаше таа поддршка во тој обем. На домашен план, пак, се направи голема поларизација на општеството и сѐ на сѐ сметам дека тој настан фрли една дамка во функционирањето на државата“,
сведочеше Димитриев.
Сведоци на одбраната ќе се испитуваат уште на неколку наредни рочишта, а потоа треба да следува и исказ на обвинетите. Следното рочиште треба да се одржи на 11 февруари.
Покрај ексминистрите Миле Јанакиески и Спиро Ристовски, обвинети за организацијата на настаните од 27 април 2017 година во Собранието се и поранешниот претседател на Собранието Трајко Вељаноски и бившиот директор на УБК, Владимир Атанасовски. Сите се гонат за делото терористичко загрозување на на уставниот поредок и безбедноста.