Според економските експерти, очекувањата се дека Русија и Европската унија ќе претрпат економски штети и социјални последици поради жестоките западни санкции, додека Макрон, чија земја претседава со Унијата, посочи дека компаниите, луѓето и секојдневниот живот ќе се соочат со „длабока промена во наредните месеци“
Поради војната во Украина, на Европската унија ѝ се заканува инфлација, со тоа што цените на енергијата и суровините се во пораст, а аналитичарите предупредуваат дека неизбежен е пад на производството и потрошувачката. Поради тоа постои закана од стагфлација – економски раст на нула со инфлација.
Тие оценки на економските аналитичари во ЕУ се поклопуваат со предупредувањето од францускиот претседател Емануел Макрон дека „историјата се повторува“ во Европа, додека војната во Украина „влегува во уште полоша фаза“.
Макрон рече дека тоа било повеќе од претчувство по разговорите со рускиот претседател Владимир Путин, кој му рекол дека Русија без двоумење ќе продолжи да ја „демилитаризира“ и да ги отстрани „нацистичките сили“ од украинската власт и да постигне неутрален статус за Украина.
Според економските експерти, очекувањата се дека Русија и Европската унија ќе претрпат економски штети и социјални последици поради жестоките западни санкции, додека Макрон, чија земја претседава со Унијата, посочи дека компаниите, луѓето и секојдневниот живот ќе се соочат со „ длабока промена во наредните месеци“.
Советот на министри на ЕУ повика на „итни мерки“ за спас на сточарството и европското земјоделство, погодени од големиот скок на цените на житарките и маслодајните култури на светскиот пазар, особено поради прекинот на извозот од Русија и Украина, од каде што Унијата увезува значителни количини житни култури.
Во прегледот на францускиот весник „Фигаро“ се подвлекува дека Европа е „соочена со непознатите на еден поскап свет“, а истакнати аналитичари посочуваат дека централните банки се пред „суров избор“ да ја запрат инфлацијата со зголемување на каматните стапки и со тоа да спречат пад на потрошувачката, или да се задржи производството на ниско ниво“.
Лондонски„Економист Интелиџенс Јунит“ (ЕИУ) исто така смета дека „руската инвазија на Украина ќе предизвика економски и политички промени во Европа“.
Тинк-тенкот на „Економист Груп“ наведува дека „економските санкции против Русија сепак ќе имаат ограничено влијание, но дека неизвесноста за продолжување на војната неизбежно ќе влијае на инвестициите и потрошувачката, додека порастот на светските цени на суровините ќе поттикне висока инфлација и прекини во синџирот на снабдување.
ЕИУ предупредува дека „Европа е во опасност да остане без руски гас доколку Москва го затвори вентилот како одмазда за санкциите, да се соочи со масовен прилив на украински бегалци и огромно нарушување на финансискиот пазар и нарушување на трговијата“.
Германскиот сајт „Евроинтелиџенс“ посочува на фактот дека Москва, и покрај војната, не ја прекина испораката на гас за Европа преку Украина, дека плаќањата за гас, и покрај санкциите, продолжуваат да се одвиваат преку „Сбербанк“ и „Гаспром банка“, двете најголеми во Русија поради огромниот скок на цените на бензинот. На Русија тоа ѝ носи голем профит, но Европа нема избор бидејќи не може да опстане без рускиот гас.
„Евроинтелиџенс“ забележува дека не е јасно колку долго ќе трае ситуацијата во која ЕУ во моментов навива за Украина од далечина, гледајќи од нејзините топли домови, загреани со руски гас.