Директорот на штипската болница, Ален Георгијев, како што соопштија од МЗ, побарал да се изготви комплетен извештај за начинот на третман на пациентот, а по надзорот јавноста ќе биде поконкретно информирана за случајот
Роднини на починатиот 25-годишник на социјалните мрежи информираа дека тој починал откако добил сепса по дренирање заб во штипската болница
Државниот санитарен и здравствен инспекторат во моментов спроведува вонреден инспекциски надзор во Клиничката болница Штип по сознанијата оти 25-годишен пациент починал од сепса, информираат од Министерството за здравство.
Директорот на штипската болница Ален Георгијев, како што соопштија од МЗ, побарал да се изготви комплетен извештај за начинот на третман на пациентот.
Претходно, на социјалните мрежи, роднини на починатиот пациент Ј.Д. (25) од Берово информираа дека тој починал откако добил сепса по дренирање заб во штипската болница.
„Само во нашата држава, само со нашето здравство, само со нашите ‘професионални’ доктори во штипската болница може да се случи ова. Со 20-годишен стаж да направиш интервенција на заб и да ставиш еден обичен дрен наопаку, па да предизвикаш сепса и пациентот да го пратиш дома со што предизвика на Ванчо животот да му згасне на само 25 години. Срам за целата држава! Каде живееме ние, какво здравство имаме, дали веќе еден ден некој ќе одговара за секојдневниот хорор во таа штипска болница“,
стои во фејсбук-објавата на роднините на починатиот.
Смртта на пациентот ја потврдија и од штипската болница.
По завршениот вонреден инспекциски надзор, Министерството за здравство информира дека јавноста ќе биде поконкретно информирана.