Три жалби, според штипска Апелација пристигнале во петокот, а денес примиле уште 14 жалби
Апелацискиот суд во Штип утре ќе ги објави одлуките по жалбите на дел од осомничените за пожарот во т.н. кабаре „Пулс“ во Кочани.
Од второстепениот суд за државната новинска агенција МИА изјавиле дека постапуваат под 17 жалби за изречени мерки притвор, куќен притвор и мерки на претпазливост поднесени од лица опфатени во истрагата за пожарот што ја води тим обвинители од Основните јавни обвинителства во Кочани, Скопје и Штип.
Три жалби, според штипска Апелација пристигнале во петокот, а денес примиле уште 14 жалби.
„Штипска Апелација утре ќе ги објави одлуките за притворските предмети за Кочани. Многу жалби има, а само тројца судии се за такви предмети“,
велат од Апелацискиот суд во Штип.
Инаку, второстепениот суд во Штип треба да одлучува жалбите на одлуките на Основниот суд во Кочани.
Меѓу осомничените за пожарот во т.н. кабаре во „Пулс“ во Штип“, кој е во притвор е и поранешниот министер за економија и висок функционер на ДУИ, Крешник Бектеши.
Затворскиот во куќен притвор му беше заменет на поранешниот градоначалник на Кочани, Љупчо Папазов, кој си поднесе оставка од функцијата по трагедијата во Кочани.
Покрај нему, затворскиот притвор со куќен им беше заменет и на поранешниот директор на Државниот пазарен инспекторат (ДПИ), Горан Трајковски, еден инспектор од оваа институција и член на обезбедувањето на клубот.
Во куќен притвор се и другите двајца поранешни градоначалници на Кочани, Ратко Димитриевски и Николчо Илијев.
Семејствата на загинатите во пожарот во т.н. кабаре „Пулс“ во Кочани утре ќе организираат „Марш на ангелите“ во Скопје. Маршот ќе започне во 12:05 часот симболизирајќи ја, како што рекоа, задоцнета реакција во Скопје. Собирот ќе почне пред Јавното обвинителство, ќе продолжи на плоштадот „Македонија“ и пред Собранието.
Од Јавното обвинителство на Република Северна Македонија денеска ги поканија семејствата на жртвите од трагедијата во Кочани утре да го посетат Обвинителството и да се запознаат со сите аспекти од истражната постапка за пожарот.
Блиските на загинатите, како што соопштија од Обвинителството ќе може да определат свои претставници – најмногу по еден член од семејство на секоја од жртвите – кои ќе остварат средба со државниот јавен обвинител и обвинителите кои постапуваат во предметите.
Во пожарот во дискотеката „Пулс“ во Кочани што се случи рано изутрина на 16 март, животот го загубија 62 лица, а со повреди се здобија околу двесте.
За трагедијата, која ја потресе целата држава истрага се води против 68 физички и три правни лица, соопшти министерот за внатрешни работи, Панче Тошковски минатата недела.