Во ковид-центарот во Штип на Инфективното одделение, тамошен граѓанин предизвикал инцидент откако сакал насилно да влезе во одделот и да посети роднина заболена од ковид-19.
Дваесет и деветгодишниот Х.Х. од Штип бил спречен во намерата од медицинскиот персонал кој во тоа време бил на смена. Вработените го пријавиле и случајот во полиција, а меѓу нив и лекарката која наместо да ги лекува пациентите трпела агресивно однесување, но и вербални закани и навреди.
Директорот на Клиничка болница-Штип, Ален Ѓеорѓијев, го потврди случајот и рече дека од страна на вработените и дежурниот лекар е пријавен во Полициската станица во Штип.
Ова е прв ваков инцидент во регионалниот ковид-центар од почетокот на пандемијата, во кој се лекуваат пациенти од сите општини од Источниот регион.
Надлежните од СВР-Штип најавија дека против Х.Х ќе биде поднесена кривична пријава за загрозување на сигурноста на службено лице на работно место.