Шпанската левичарска влада предводена од премиерот Педро Санчез пред шест месеци објави закон кој може да опфати околу 370 Каталонци, но тој беше правно оспорен, а го оспори и десницата во парламентот, поради што дури сега дојде на конечно гласање
Шпанскиот парламент со 177 гласа „за“ и 172 „против“ го усвои законот за амнестија со кој ќе се запре гонењето на Каталонците кои во 2017 година го организираа забранетиот референдум за независност.
Шпанската левичарска влада предводена од премиерот Педро Санчез пред шест месеци објави закон кој може да опфати околу 370 Каталонци, но тој беше правно оспорен, а го оспори и десницата во парламентот, поради што дури сега дојде на конечно гласање.
Санчез претходно изјави дека законот ќе доведе до помирување и соживот во автономната покраина со 7,5 милиони жители. Десничарските партии во неделата организираа протест во Мадрид, каде според нивната проценка се собраа 80 000 демонстранти, а според владата на Санчез 20 000. Десничарската Народна партија и десничарската Вокс го обвинија Санчез за „предавство“.
„Денес е историски ден. Добиена е битка во вековниот конфликт меѓу каталонската и шпанската нација“,
рече портпаролката на каталонската партија за независност Јунтс, Миријам Ногуерас, за време на парламентарната дебата.
Во изминатите 14 години, Каталонија имаше влада која се залагаше за отцепување од Шпанија. Поранешниот каталонски премиер Карлес Пучдемон, кој е во егзил во Белгија, прогласи независна република Каталонија во 2017 година. Сепак, таа декларација не беше спроведена.
Малцинската влада на Санчез во Шпанија, во парламентот зависи од поддршката на партиите кои се за независност, вклучително и партијата Заедно за Каталонија на која ѝ припаѓаат Пуџдемон и Ногуерас.