Северна Македонија е витален партнер од Западен Балкан, преземајќи важна лидерска улога во обликувањето на безбедноста и стабилноста во регионот и во цела Европа, во момент без преседан. Патот напред за Северна Македонија, како и оној на остатокот од Европа, бара напорна работа и жртва. Соединетите Држави се партнер во справувањето со тие предизвици. Благодарни сме ѝ на Северна Македонија за нејзината цврста поддршка како партнер и доверлив НАТО сојузник, истакнал советникот на Стејт департментот на САД на средбата со владиниот врв
Патот напред за Северна Македонија, како и оној на остатокот од Европа бара напорна работа и жртва, а Соединетите Држави се партнер во справувањето со тие предизвици, истакнал советникот на Стејт департментот, Дерек Шоле за време на денешната посета на земјава и средбите со претставниците на Владата, се наведува во соопштението од амбасадата на САД во земјава, објавено на нејзината официјална интернет-страница.
Шоле, како што се потенцира во соопштението, на средбата со клучните владини претставници ги потврдил цврстите односи меѓу САД и С Македонија и ѝ честитал на Владата за претседавањето на земјава со ОБСЕ, истакнувајќи го значењето на овој потфат кој доаѓа во клучен момент за европската безбедност.
„Северна Македонија е витален партнер од Западен Балкан, преземајќи важна лидерска улога во обликувањето на безбедноста и стабилноста во регионот и во цела Европа, во момент без преседан. Патот напред за Северна Македонија, како и оној на остатокот од Европа, бара напорна работа и жртва. Соединетите Држави се партнер во справувањето со тие предизвици. Благодарни сме ѝ на Северна Македонија за нејзината цврста поддршка како партнер и доверлив НАТО сојузник во предзвиците со руската агресија во Украина и помошта во релокацијата на лицата евакуирани од Авганистан“, истакнал Шоле, се посочува во соопштението.
По средбата со премиерот Димитар Ковачевски и другите клучни министри во Владата на Северна Македонија, советникот Шоле замина за Косово, велат од амбасадата на САД во земјава.
Од владината прес-служба денеска по средбата меѓу премиерот, Димитар Ковачевски и советникот на американскиот државен секретар, Ентони Блинкен соопштија дека на неа било констатирано дека стратегиското партнерство на Северна Македонија со САД е силна поддршка на сите важни процеси за демократската иднина на државата и за унапредувањето на квалитетот на живот на граѓаните.
Оттаму информираа дека на средбата било разговарано за актуелни прашања од значење за евроинтеграциите на државава, за справувањето со економско-енергетската криза и за ситуацијата во регионален контекст.
„Во таа насока е потенцирана јасната поддршка од САД за напредокот во евроинтеграциите на Република Северна Македонија, како прашање од значење и за европските перспективи, стабилноста и безбедноста и во регионот, што се покажа посебно неопходно, по војната во Украина“,
соопштија од Владата.
На средбата премиерот Ковачевски, како што се наведува во соопштението, го посочил значењето на постојаната соработка што ја има Северна Македонија со САД во борбата против корупцијата и владеењето на правото, со цел да се унапреди владеењето на правото и да се засили борбата против корупцијата.
„Секако дека разговаравме и за уставните измени со оглед на тоа дека тие се една од одлуките која ќе треба да биде донесена до полноправното членство на државата во ЕУ. САД од самиот почеток на нашата независност се наш стратегиски партнер и секогаш сме имале поддршка од нив во носењето на сите вакви одлуки, така беше и со отпочнувањето на преговорите со ЕУ, со зачленувањето во НАТО, а така е и со непреченото одвивање на преговорите со ЕУ“,
истакна Ковачевски за средбата.
Листата за санкции или т.н. црна листа не била тема на средбата што премиерот Димитар Ковачевски утрово ја имаше во Владата со советникот на Стејт департментот.
На средбата со Шоле премиерот Ковачевски беше придружуван од вицепремиерката задолжена за политики за добро владеење, Славица Грковска и министрите за надворешни работи Бујар Османи, за одбрана Славјанка Петровска, за внатрешни работи Оливер Спасовски и за економија Крешник Бектеши, додека Шоле беше придружуван од заменик-шефот на Амбасадата на САД во Скопје, Ерик Мејер и од претставници од Амбасадата.
Посетата на советникот на Стејт департментот на земјава е во рамки на балканската турнеја во која освен Скопје, Шоле ќе ги посети и Белград и Приштина. Целата на оваа турнеја, како што претходно нагласија од Стејт департментот, е да се нагласи трајната посветеност на САД за мир, стабилност и просперитет на Западен Балкан.
Утре Шоле ќе продолжи за Белград, каде што со раководството на српската влада ќе разговара за енергетската безбедност, регионалната економска интеграција и напредокот кон целта на Србија за пристап во ЕУ. Тој, исто така, ќе разговара за улогата на Србија во зајакнувањето на регионалниот мир и безбедност и нејзиниот континуиран ангажман во дијалогот олеснет од ЕУ за нормализирање на односите со Косово.
Посетата на Шоле на земјите од Западен Балкан беше најавена за декември минатата година, но тој ја откажа својата турнеја во последен момент поради позитивен тест на ковид.