На средбата е потенцирана јасната поддршка од САД за напредокот во евроинтеграциите на Република Северна Македонија, како прашање од значење и за европските перспективи, стабилноста и безбедноста и во регионот, што се покажа посебно неопходно, по војната во Украина
Традиционалното, искрено и долгогодишно пријателство со САД има големо значење во развојот на демократските, реформските и интеграциските процеси на Република Северна Македонија, оценето е на денешната средба на премиерот Димитар Ковачевски со Дерек Шоле, советник на државниот секретар на САД, Ентони Бликнен.
На средбата е констатирано дека стратегиското партнерство на Северна Македонија со САД е силна поддршка на сите важни процеси за демократската иднина на државата и за унапредувањето на квалитетот на живот на граѓаните.
Од прес-службата на Владата информираат дека на средбата е разговарано за актуелни прашања од значење за евроинтеграциите на државава, за справувањето со економско-енергетската криза, за ситуацијата во регионален контекст.
„Во таа насока е потенцирана јасната поддршка од САД за напредокот во евроинтеграциите на Република Северна Македонија, како прашање од значење и за европските перспективи, стабилноста и безбедноста и во регионот, што се покажа посебно неопходно, по војната во Украина“,
се вели во владиното соопштение.
Премиерот Ковачевски вели дека ова е многу важен состанок, со значаен претставник од САД, на кој има можност да се поразговара за најактуелните теми коишто се однесуваат на задржувањето на реформскиот курс на државата и на потребните одлуки што треба да се донесат во текот на 2023, со цел Северна Македонија непречено да ги продолжи преговорите со ЕУ. Во таа насока премиерот Ковачевски ја посочи потребната конструктивност во Парламентот за усвојувањето на уставни измени, со цел придвижување на европскиот пат.
„Секако дека разговаравме и за уставните измени со оглед на тоа дека тие се една од одлуките која ќе треба да биде донесена до полноправното членство на државата во ЕУ. САД од самиот почеток на нашата независност се наш стратегиски партнер и секогаш сме имале поддршка од нив во носењето на сите вакви одлуки, така беше и со отпочнувањето на преговорите со ЕУ, со зачленувањето во НАТО, а така е и со непреченото одвивање на преговорите со ЕУ“,
вели Ковачевски.
На средбата премиерот Ковачевски, како што се наведува во соопштението, го посочи значењето на постојаната соработка што ја има Северна Македонија со САД во борбата против корупцијата и владеењето на правото, со цел да се унапреди владеењето на правото и да се засили борбата против корупцијата.
Како една од темите на разговор била и претседавањето на нашата држава со ОБСЕ, при што премиерот Ковачевски посочил на подготовките на министерот Османи за презентација на приоритетите на македонското претседателство со ОБСЕ во текот на наредните денови во Виена.
„Посебно внимание беше посветено на делот околу справувањето со енергетската криза, на што Владата е силно посветена, а има поддршка и од нашите партнери од САД. Во текот на носењето на сите мерки и во текот на обезбедувањето на се што е потребно за непречено снабдување со електрична енергија со субвенционирани цени имавме голема помош од САД и конкретно од Шоле, а таа соработка ја продолжуваме и понатаму“,
вели Ковачевски.
По средбата договорен е нов состанок во делот на стратегискиот дијалог што го има Република Северна Македонија со САД, што е предвидено да се случи во првата половина на оваа 2023 година.
На средбата премиерот Ковачевски беше придружуван од вицепремиерката задолжена за политики за добро владеење Славица Грковска и министрите за надворешни работи Бујар Османи, за одбрана Славјанка Петровска, за внатрешни работи Оливер Спасовски и за економија Крешник Бектеши, додека Шоле беше придружуван од заменик-шефот на Амбасадата на САД во Скопје, Ерик Мејер и од претставници од Амбасадата.
Посетата на советникот на Стејт департментот на земјава е во рамки на балканската турнеја во која освен Скопје, Шоле ќе ги посети и Белград и Приштина. Целата на оваа турнеја, како што претходно нагласија од Стејт департментот, е да се нагласи трајната посветеност на САД за мир, стабилност и просперитет на Западен Балкан.
Утре Шоле ќе продолжи за Белград, каде што со раководството на српската влада ќе разговара за енергетската безбедност, регионалната економска интеграција и напредокот кон целта на Србија за пристап во ЕУ. Тој, исто така, ќе разговара за улогата на Србија во зајакнувањето на регионалниот мир и безбедност и нејзиниот континуиран ангажман во дијалогот олеснет од ЕУ за нормализирање на односите со Косово.
Посетата на Шоле на земјите од Западен Балкан беше најавена за декември минатата година, но тој ја откажа својата турнеја во последен момент поради позитивен тест на ковид.