Според пријавата на бугарската амбасадорка во Хрватска, Генка Веселинова Георгиева, изминатите неколку дена, поради изјавите на претседателот Зоран Милановиќ за односот на Софија кон Скопје, во Загреб се случиле три инциденти во кои биле нападнати државјани на Бугарија.
Како што јавува „Јутарњи лист“, пријавите биле доставени до тамошното Министерство за надворешни работи и до владата, а хрватската полиција се обидува да ги расчисти инцидентите.
Според сознанијата на весникот, полицијата истражува два од случаите, додека третиот бил решен со помош на бугарската амбасада.
Првата пријава се однесувала на постара госпоѓа, бугарска државјанка која поради политиката на Бугарија кон Македонија ја нападнал таксист. Таа влегла во неговото возило, а таксистот најпрво ѝ приговорил дека таа пресилно ја затворила вратата. Потоа, како што пишува весникот, ја прашал од каде е, а откако чул дека од Бугарија, следувал агресивен вербален напад.
„Вие Бугарите со својата валкана политика кон Македонија, доаѓате да живеете овде во нашата убава Хрватска“,
ѝ рекол таксистот по што го застанал својот автомобил, побарал таа да му плати и да го напушти возилото.
Во пријавата уште стоело дека откако таа излегла и побарала да ѝ помогне и да ја извади торбата од багажникот, таксистот грубо ја фрлил кон неа, по што госпоѓата паднала на земја.
Вториот случај го пријавила државјанка на Бугарија, врз чиј сопруг на некој од загрепските пазари биле фрлани продукти. На инцидентот му претходела расправа околу потеклото на производите, па откако продавачот разбрал дека неговиот купувач е бугарски државјанин, почнал да го навредува и да фрла продукти по него велејќи му дека „Бугарија ја уценува несреќната Македонија“.
Во третиот случај, наводно, на синот на една бугарска државјанка му бил забранет пристап во градинка во Загреб. Но, поради сомнежот за дискриминација на детето, по интервенција на бугарската амбасадата, случајот не ескалирал.
Според „Јутарњи лист“, овие случаи уште завчера во јавноста ги спомнал премиерот Андреј Пленковиќ прозивајќи го претседателот Зоран Милановиќ дека е подбуцнувач и дека инцидентите се случуваат откако тој ја нападнал Бугарија за однесувањето кон Македонија.