Протестниот собир ќе започне во петок во 14 часот од местото каде што беше поставена модуларна болница, а преку центарот на градот ќе заврши пред судот во Тетово
По точно две години од пожарот во модуларната болница во Тетово во кој загинаа 14 луѓе, семејствата на починатите ќе излезат на протест со барање за ново обвинение за случајот. Протестот ќе се одржи в петок, 8 септември, на двегодишнината од несреќата која се случи на овој ден во 2021 година.
„Очекуваме ново обвинение. Од почетокот бараме правда и очекуваме правда, но во оваа држава се гледа дека нема правда. Но, излегува вистината кој е крив. Јас спомнав неколку пати дека не се овие тројца, имаат нешто вина, ама има и поголем синџир. Тие од ИРЛ новинарите ја извадија вистината кој е виновен, а кој не е виновен“,
изјави Мумин Исмаили, кој во пожарот ги загубил братот и мајката.
Протестниот собир ќе започне во петок во 14 часот од местото каде што беше поставена модуларна болница, а преку центарот на градот ќе заврши пред судот во Тетово.
„Ние како фамилии на починатите во пожарот го организираме протестот и порачуваме на сите граѓани да се приклучат во петок во 14 часот. На сите граѓани на Тетово им порачуваме ова да не биде партиски, ние фамилиите сме организатори и да нема инцидент“,
истакна Исмаили.
Судскиот процес за кривичните дела поврзани со пожарот во тетовската модуларна болница заврши на 5 јуни годинава. Обвинетите директори Флорин Бесими и Артан Етеми за кривичното дело тешки дела против општата сигурност добија казна од една година и шест месеци, со услов во наредните три години да не го повторат делото.
За докторот Бобан Вучевски, пак, кој се товареше за делото непостапување по здравствени прописи, Судот во Тетово донесе ослободителна пресуда.