Една од целите на оваа коалиција, како што беше речено, е да се придобијат гласачите што се разочарани од ДУИ, која сите овие години е на власт
„Држава за сите“ е мотото под кое на изборите ќе настапат заедно партиите Алијанса за Албанците и Алтернатива, кои денеска во Скопје ја официјализираа коалицијата. Претседателите на двете партии, Зијадин Села и Африм Гаши, го потпишаа договорот за заеднички настап откако не постигнаа договор за трипартитна коалиција со Беса наспроти владејачката ДУИ.
И додека Беса е во разговори за можно партнерство со СДСМ, Села, по потпишувањето на договорот за коалицирање со Алтернатива, изјави дека смета оти не се создадени сè уште услови за етнички мешани коалиции.
„Нашето мото за изборите ќе биде „Држава за сите“. Сѐ додека во Македонија немаме држава за сите, сѐ додека институции од ЕУ кажуваат дека постои дискриминација на етнички план во Северна Македонија, мислам дека не се создадени услови за да имаме такви предизборни коалиции“,
рече Села.
Гаши, пак, нагласува дека примарна цел на оваа предизборна коалиција меѓу Алтернатива и Алијанса за Албанците е победа во албанскиот политички блок и влез во владина коалиција.
„Многу е битно да се направи промена во албанскиот блок. Ние сакаме таа победа да ја оствариме заедно. Легитимитетот на нашата коалиција да биде целосен по 12 април. Тоа е многу битно и за демократијата и за настаните потоа“,
рече Гаши.
Една од целите на оваа коалиција, како што беше речено, е да се придобијат гласачите кои се разочарани од ДУИ, која сите овие години е на власт.