На денешната средба со амбасадорката Холштајн, претседателот на АА ѝ предал официјално барање до германскиот државен министер за Европа
Лидерот на Алијансата за Албанците, Зијадин Села, побара од германскиот државен министер за Европа, Михаел Рот, да поведе европска иницијатива за владеење на правото во нашата земја.
На денешната средба со германската амбасадорка во Скопје, Анке Холштајн, Села, како што соопштуваат од АА, ѝ предал официјално барање до Рот – „да мобилизира сеопфатна европска иницијатива за владеење на правото во Северна Македонија“.
„По средбите со амбасадорите на земјите членки на ЕУ за забрзување на реформите во судството, претседателот на АА денеска оствари средба со амбасадорката Холштајн. Села разговараше за политичките случувања во земјата, со посебен акцент на ставовите и постапките на коалицијата Алијанса за Албанците и Алтернатива кон прашањето за државјанството и борбата против корупцијата“,
соопштија од АА.
Во овој контекст, од партијата на Села посочуваат дека Германија одигра незаменлива улога во решавањето на политичката криза во 2015 година и во напорите за воспоставување на владеењето на правото во нашата земја, вклучително и преку групата на Рајнхард Прибе. Понатамошната заложба на Германија за зајакнување на судството за справување со корупција на високо ниво и политички монтирани случаи, сега е уште поважна, во пресрет на отворањето на преговорите со ЕУ, велат од АА.