Постојаното унапредување на стандардот на работниците и на нивните права мора да биде приоритет на сите политички и општествени фактори, се дел од пораките кои денеска ги упатија шефот на државата, собранискиот спикер и премиерот
Единствено задоволните работници се успешни и мотивирани кои можат да придонесат за напредок и просперитет на земјата, вели претседателот на државата Стево Пендаровски во пораката по повод Денот на трудот, 1 Мај.
Според Пендаровски, човечкиот ресурс е најскапиот, а фактот што голем дел од развиените демократии денес се соочуваат со недостиг на работна сила е „аларм за сите нас дека треба сериозно да се посветиме на заштита и унапредување на работничките права“.
Пендаровски вели оти секој работник треба да има фер третман од страна на работодавачот, да се чувствува безбедно, сигурно и заштитено на работното место, да има достоинствени услови за работа, а неговиот труд да биде соодветно вреднуван.
„Наша задача е да продолжиме да ги поддржуваме заложбите на синдикалните организации, да помогнеме во унапредување на стандардите и условите за работа, со цел сите работници да имаат праведни и еднакви можности за реализација и развој на професионален план“,
додава во пораката Пендаровски.
Порака за Денот на трудот, 1 Мај испрати и претседателот на Собранието Јован Митрески кој вели дека почитувањето и соодветното вреднување на трудот на работникот е темелот на изградбата на рамноправно, економски просперитетно и социјално праведно општество.
Митрески, потсетувајќи дека овој собраниски состав го има донесено Законот за минимална плата, додава дека борбата за работничките права не престанува никогаш и дека, независно од моменталните политички или економски прилики, секогаш е неопходно да се развива социјалниот дијалог на различни нивоа, меѓу работниците, синдикатите, работодавачите, стопанските комори и властите.
Според Митрески, постојаното унапредување на стандардот на работниците и на нивните права мора да биде приоритет на сите политички и општествени фактори, затоа што, како што вели тој, тоа ги мотивира работниците да ги вложат сите знаења и потенцијали во исполнувањето на своите работни обврски.
Претседателот на Владата Талат Џафери, во пораката по повод Денот на трудот, 1 Мај, вели дека за државата, како идна земја членка на ЕУ, почитувањето и еднаквиот третман на работниците и работничките права е императив.
Џафери додава дека секогаш треба да се размислува во насока на унапредување на работничките права, заштита на работниците и работодавачите.
„Како идна земја членка на Европската Унија, наша заложба е да ги штитиме работниците и да осигураме еднаков и фер третман за нив од работодавачите, бидејќи секој работник е пред сѐ, човечко битие кое заслужува почит и достоинствен живот“,
вели Џафери.